Salmos 51 - Bible in Tzeltal de Oxchuc y Tenejapa

Dios cu'un na'bon yo'bolil jba

¹ Dios cu'un, ta swenta xc'uxul awo'tan, na'bon me yo'bolil jba; ta swenta te smuc'ul yutsil xc'uxul awo'tane, tup'bon spisil a te jmule.

² Pocbon loq'uel te bila amen jpasoje; pasbon ta sac te co'tane.

³ Ya jna' te yu'un la jtoy jba ta atojole; te jmule spisil ora ma xch'ay ta co'tan.

⁴ Ja'at nax te jtaoj jmul ta atojole, ja'at nax atuquel, melel jo'on la jpas te bila amen, te ya awac' castigo yu'une. Ja' yu'un te castigo ya awac'bone, stojil ay stuquel, ma'yuc ta ch'ayel te bila chapal awu'un atuquele.

⁵ Ta mero melel, amenonix a te c'alal ayinone; ayonix ta mulil a te c'alal ayon to ta xch'ujt' a te jme'e.

⁶ Ta mero melel ja' c'ux ta awo'tan te mach'a smelelil ya xc'opoje; ta mero yutil co'tan la awac'bon te p'ijil c'ope.

⁷ Lecubtesawon soc hisopo, te jich me pocbil ya xc'oon; pocawon, jich me sac ya xc'oon te bit'il buen sac te toibe.

⁸ Nojesbon sbujts' co'tan soc ac'bon yutsil q'uinal caiy; cha'bujts'antesbon xan co'tan, manchuc me c'axemix jwocol ta jbaq'uetal awu'un.

⁹ Ma me x'ana'bon xan te jmule, tup'bon spisil te bila amen jpasoje.

¹⁰ Dios cu'un, pocbon ta lec te co'tane. Ac'bon xan yach'il sbujts' co'tan te toj ya x'ainon yu'une.

¹¹ Ma me xapijt'eson soc ma me xach'ayon ta awo'tan; ma me xapojbon loq'uel te ch'ul espíritu awu'une.

¹² Ac'bon xan caiy ta co'tan te yutsilal te colel awu'une; ja' xawac' x'ipajon a te espíritu awu'un te c'ax bayal yutsile,

¹³ swenta yu'un ya me cac'bey yil beetic awu'un te jch'ay-mandaletique, jich me ya xcha'sujt'es xan yo'tanic ta atojol te jmulawiletique.

¹⁴ Dios cu'un, ac'awon ta libre yu'un te la caiy milaw, melel Diosat te Jcoltaywanejat cu'une; ya me jpucbat ac'oplal ta c'ayojetic te toj awo'tan atuquele.

¹⁵ Cajwal, jambon que, yu'un jich me ya jc'ajintayat ta yalel yutsil ac'oplal.

¹⁶ Melel ma x'ac'an majt'anil soc chic'bil majt'aniletic; ya cac'bat te jichuque; ja'uc me to, ma ja'uc lec awo'tan yu'un.

¹⁷ Te majt'aniletic ya sc'an te Diose, ja' te mach'a mero ya smel yo'tan yu'un te smule; Dios cu'un, ma ba ya awilay atuquel te mach'a peq'uel ya yaiy sba soc te ma'yuquix ta q'uinal ya yaiy ta yo'tane.

¹⁸ Pasbeya bila lec ta stojol te Sión ta swenta yutsil sc'anjel awo'tan; cha'pasbeya xan sjoyob sts'ajc'ul te lum Jerusalén.

¹⁹ Jich me ya atsac te milbil majt'aniletic te ya sc'an aq'uel ta atojole, te majt'anil chambalametic te scojt'ol ya yich'ic chiq'uel soc te yantic milbil chambalametic; jich me ya jmiltic wacaxetic ta scajtijib amajt'an.