Salmos 5 - Bible in Tzeltal de Oxchuc y Tenejapa

Jajch' yan c'aal cu'untic soc Dios

^1-2 Cajwal, Muc' Ajwalilat cu'un soc Diosat cu'un, aiybon awaiy stojol jc'op, ich'bon ta wenta te cajc'ane. Aiybon awaiy stojol te ya calbat wocole, ya me jtoyes jc'op ta atojol.

³ Ta sab ya me awaiybon stojol te jc'ope; ta buen sab ya jcholbat te jwocole, ya me jmaliybey sujt'ib te jc'ope.

⁴ Diosat te mero ma lecuc awo'tan yu'un te bila amene; te mach'atic amenic ma xju' ya x'ainic ta ats'eel.

⁵ Ma'yuc banti ay yawilic ta atojol te mach'atic toybaetique; ma lecuc awo'tan yu'un te mach'atic amen yat'elique.

⁶ Ya ajin te mach'atic ya spasic lot; ya awilay ta jc'axel te mach'atic ay bila muquen ay ta yo'tanic soc te jmilawetique.

⁷ Yan te jo'one, ta scaj te smuc'ul xc'uxul awo'tane, ya xju' x'ochon ta templo awu'un; ya xju' ya jquejan jba ta atojol soc co'tan, ta yilel bael te ch'ul templo awu'une.

⁸ Cajwal, ta scaj te jcontrotac neelajan bael cu'un ta sbelal toj-o'tanil awu'un, ic'awon bael ta lequil be.

⁹ Te mach'atic amenic ma'yuc bay lec te sc'opique; yac ta bolobel te yo'tanique. Jujt'ul muquenal te yeique; te ye yat'elinej paslot ta jyalel.

¹⁰ Dios cu'un, ac'beya castigo. Pasbeya te ja'uc ya staic falta soc te bila amen xchapojique. Ta scaj te bayal smulic ac'a yich'ic ilayel awu'un ta jc'axel, melel stoyoj sbaic ta atojol.

¹¹ Binuc nax yo'tanic te mach'atic ya sleic te canantayel awu'une; ac'a c'ajinuc soc sbujts' yo'tanic ta spisil ora, melel ja'at ya acanantay. Te mach'atic c'uxat ta yo'tan bin nax yo'tanic ta awenta.

¹² Jich yu'un, te ja'at Cajwal, ac'beya bendición te mach'a jun yo'tan ta atojole; te yutsil awo'tan ac'beya jichuc smajq'uil.