Salmos 48 - Bible in Tzeltal de Oxchuc y Tenejapa

Yutsil sc'oplal Sión, lum yu'un Dios

¹ Muc' te Cajwaltique; snujp' te ya yich' albeyel yutsil sc'oplal ta lum yu'un soc ta ch'ul wits yu'un.

² Mero t'ujbil stoyolil te wits Sión, ja' te lum ay ta stojol norte. Ja' yutsil q'uinal ya yaiy yu'un ta spamal balumilal; ja' lum yu'un te mero muc' ajwalile.

³ Te Diose ay ta palacioetic ta Jerusalén; Te Diose la yaq'uix sba ta na'el te ja' mero anjibale.

⁴ Melel la stsob sbaic te muc' ajwaliletique, pajal tal yac'beyic guerra te lum Jerusalén;

⁵ pero c'alal la yilic te lume, tal xiwel ta yo'tanic, jajch'ic ta xiwel, jich jajch'ic bael ta anel.

⁶ Jc'axel u'uninotic yu'un xiwel: la sts'otilay sbaic yu'un xc'uxul, jich bit'il ants ya x'ayinix yal;

⁷ jich bit'il ic' ya xtal ta sloq'uib c'aal te ya sjin te barcoetic yu'un Tarsis.

⁸ La quiltiquix ta jsitic ta bay lum yu'un te Dios cu'untique, ja' te Cajwaltic te Spisil ya xju' yu'une. Jich nix te bit'il albil caiytique: sbajt'el q'uinal ay yu'un Dios te Jerusalén.

⁹ Dios cu'un, c'alal ayotic ta yolil a te templo awu'une, ya xtal ta co'tan te c'ax muc' te xc'uxul awo'tan ta jtojole.

¹⁰ Dios cu'un, ta spisil q'uinal albil yutsil ac'oplal, jich nix te bit'il ya sc'an alel sc'oplal te abiile. Ta swenta awu'el ya achajpan te bila stojil ta chajbanele.

¹¹ Ac'a bujts'najuc yo'tan te wits Sión. Ac'a wiluc yu'un yutsil q'uinal yaiyic te lumetic yu'un Judá ta swenta te bit'il toj ya xchajbanwanate.

¹² Beenanic ta sjoyobal Sión, ajtaybeyaic te toyol ts'ajc' swenta iljibal q'uinal ay ta sba te sts'ajc'ule;

¹³ ilbeyaic ta lec te sjoyob ts'ajc'ule soc nix te balal ts'ajq'uetic, Jich me ya xju' ya awalbeyic te patil awal-anich'anic awu'une

¹⁴ te jich ay te Dios cu'untique; ja' jtojteswanej cu'untic sbajt'el q'uinal stuquel.