Salmos 47 - Bible in Tzeltal de Oxchuc y Tenejapa

Dios ja' muc' ajwalil yu'un spamal balumilal

¹ ¡Pac'a ac'abic apisilic, lumetic! ¡Albeyaic yutsil sc'oplal Dios ta tulan soc yutsil awo'tanic!

² Melel te Cajwaltique, ja' te Mach'a mero Toyole, ay ta xi'el stuquel; ja' mero Muc' Ajwalil ta spamal balumilal.

³ La slajin lumetic soc nacionetic, la yac' bic'tajuc ta jtojoltic.

⁴ La slebotic jq'uinaltic, te bin nax yo'tan Jacob yu'une, ja' te mach'a c'ux aiyot yu'un te Cajwaltique.

⁵ Te Cajwaltic Diose moix ta smuc'ul nactijib, joytaybil ta aw swenta yutsil q'uinal soc bayal yacal ta oq'uesinel oq'uesetic.

⁶ ¡C'ajintayaic c'ayojetic yu'un te Diose; c'ajintayaic c'ayojetic yu'un te Muc' Ajwalil cu'untique!

⁷ ¡C'ajintayaic tsabil c'opetic yu'un te Diose, melel ja' Muc' Ajwalil ta spamal balumilal stuquel!

⁸ Te Diose ja' Muc' Ajwalil yu'un spisil nacionetic; te Diose nacal ta ch'ul smuc'ul nactijib.

⁹ Te winiquetic ich'bilic ta muc' ta nacionetic ya syom sbaic soc te lum yu'un te Dios yu'un Abraham.

¹⁰ Melel te Diose ja' cajal ay yu'un spisil te ajwaliletic ta balumilale; ja' cajal ay yu'un spisil bitic ay.