Salmos 46 - Bible in Tzeltal de Oxchuc y Tenejapa

Sjoinejotic Cajwaltic

¹ Te Diose ja' anjibal cu'untic, ja' ya yac' quiptic stuquel; ja' ya scoltayotic te bi ora ay jwocoltique.

² Ja' yu'un ma'yuc bi ora ya caiytic xiwel, manchuc me ya xyanaj yawil te lumq'uinale, manchuc me ya xmul ta mar te witsetique,

³ manchuc me tulan ya xc'opoj te mar, soc teme ya xjajch' stij sbaj te sbul te ja'e, manchuc me ya syuq'uilay sba te witsetic yu'un sc'ajc'al yo'tan.

⁴ Te muc'ja' ya yac'bey yutsilal te ch'ul lum yu'un Dios ta swenta te sc'abc'ab te ja'e. Ja' nax mero ch'ul lum stuquel yu'un te mach'a mero Toyole.

⁵ Te Diose ay ta yolil te lum yu'une, yac ta swentainel; Dios me ya xcoltayot yu'un ta jujun sacubel q'uinal.

⁶ Te nacionetic ya x'awunic, te wentainwanejetic ya xnijq'uic, te lumq'uinal ya x'ulub bael yu'un te c'alal ya yaiybeyic sc'op te Diose.

⁷ Te Cajwaltic te Spisil ya xju' yu'une, ja' sjoinejotic stuquel. Ja' te Dios yu'un Jacob, ja' anjibal cu'untic stuquel.

⁸ La', ila awilic te bitic jchajp nax yutsil te spasojix ta q'uinal te Cajwaltique:

⁹ jc'axel la slajinbey sc'oplal te guerra c'alal ta slajibal balumilal; la sc'asix te t'imalte'etique, la swuyix te lanzaetique, la xchiq'uix te carretaetic yu'un guerra.

¹⁰ “Lamana me abaic. Na'aic me te jo'on Dioson. Jo'on me toyolon yu'un spisil nacionetic; jo'on me toyolon yu'un ta spamal te balumilale”, xi' te Diose.

¹¹ Te Cajwaltic te Spisil ya xju' yu'une, ja' sjoinejotic stuquel. Ja' anjibal cu'untic stuquel te Dios yu'un Jacobe.