Salmos 44 - Bible in Tzeltal de Oxchuc y Tenejapa

Sc'anel scoltayel yu'un Dios

¹ Dios cu'untic, caiyojtic te bila yaloj te jme'il-tatiletique, te bila la apasbey ta stojolic te c'alal cuxajtic ta q'uinal ae, ja' te bila la apas ta nameye.

² Ja'at yat'el ac'ab te la aloq'ues bael te mach'atic ma ba xch'uunejate, la awac'bey castigo te nacionetique, ja'at la anajc'an ta sq'uinalic te me'il-tatiletique.

³ Melel ma ja'uc ta sc'abique, ni ja'uc soc te spuñalique, te ju' yu'unic tsalawe; melel ma ja'uc te ju' yu'unic te la yu'uninic te q'uinale. Ja' ta swenta awu'el soc ta swenta awip atuquel; ja' ta swenta te xojobil asit-awelaw te ju' yu'unic tsalaw ta scaj te xc'uxul ta awo'tane.

⁴ Muc' ajwalilat cu'untic, Diosat cu'untic, ja'at la awac' ta tsalaw te lum awu'une;

⁵ ja'at ta awenta te la jtsaltic te jcontrotaque; ja' ta awenta te ya jpech'antic ta teq'uel te cajcontrotique.

⁶ Ma'yuc bi ora ya yipin co'tantic te jt'imalte'tique, ni ja'uc ay bi ora ya yac'otic ta tsalaw te jpuñaltique;

⁷ ja'at te la awac'otic ta tsalaw te la jtsaltic a te jcontrotique; ja'at la awac' q'uexawuc te mach'atic xti'ton slab yo'tanic ta jtojoltique.

⁸ Dios cu'untic, spisil me ora ya caltic yutsilal te ac'oplale; spisil me ora ya caltic yutsilal te abiile.

⁹ Pero yo'tic la aloq'uesotiquix ta atojol; la awac'botiquix caiytic q'uexlal. Ma ba ya xloc'atix ta guerra soc te soldadoetic cu'untique.

¹⁰ La awac' sujt'ucotic ta anel ta stojol te jcontrotique; ya yelc'anbotic jbiluctic te mach'atic xti'ton slab yo'tanic ta jtojoltique, chican yo'tanic bila ya sc'an yich'ic bael.

¹¹ La awac'otiquix ta c'abal jich bit'il chijetic te ya yich' milele; la apuc bael te lum awu'un ta stojol te mach'atic ma ba xch'uunejate;

¹² mero peq'uel stojol la achon te lum awu'une te ma'yuc bi loc' awu'un a te la achone.

¹³ La ac'atp'unix ta sjachjibal lab-o'tanil; te jpat-jxujc'tic ya yil-o'tantayotic soc ya xq'uexlaltesotic.

¹⁴ La awaq'uix ta labanwanej ta jtojoltic te mach'atic ma ba xch'uunejate; te c'alal ya x'ilawanic ya sjimulay sjolic.

¹⁵ Spisil ora peq'uelotic ta stojolic; ya jmac jsit-quelawtic yu'un q'uexlal ya caiytic.

¹⁶ Ja' ta smul te jcontrotic te yo'tanic ay bila ya sujt'esbotic spacol a; te ja' ya yil-o'tantayotic soc te ja' ya sboltesbotic jc'oplaltique.

¹⁷ Ja' te bila c'otix ta jtojoltique, ma yu'unuc jch'ayojticat ta co'tantic. Melel ma ba jch'ayojtic ta co'tantic te trato chapal awu'une.

¹⁸ Ma ba jnopojtic te ya jch'ayticat ta co'tantique, soc ma ba calojtic te ya quijq'uitaytic te be awu'une.

¹⁹ Pero la atenotic bael ta wocol ta yawil ja'mal ts'i'etic; la amucotic ta yaxinal lajel.

²⁰ Dios cu'untic, ma ba ch'ayemat ta co'tantic; ma ba jch'uunejtic yan dios te ma ja'ucate.

²¹ Te jichuque la awilotic, melel te ja'ate ana'oj spisil te bila muquen yich'oj chapel.

²² Pero ja'at ta awenta spisil ora te quechelotic ta lajel; jichotic ta yo'tanic te bit'il chijetic ya yich'ic milele.

²³ Cajwal, ¿bi yu'un te ya xwayate? Jajch'an, Cajwal, jajch'an. Ma me jc'axeluc ya ach'ayotic.

²⁴ ¿Bi yu'un anac'oj aba jiche? ¿Bi yu'un te ch'ayemotic ta awo'tane, soc te c'ax bayal jwocoltique?

²⁵ Jc'axel pejc'ajemotiquix, jc'axel lajemix quiptic, ya jochtiquix jch'ujt'ic ta lum.

²⁶ Tejc'ana aba, Cajwal, la', coltayawotic. La', ac'awotic ta libre ta swenta te xc'uxul awo'tane.