Salmos 42 - Bible in Tzeltal de Oxchuc y Tenejapa

LIBRO 2 Jun co'tan ya jmaliy te Diose

¹ Dios cu'un, jichon bit'il chij te taquin yo'tane te ya sle ja' yuch' ta muc'ja'e; Dios cu'un, jich yacon ta jlebelat.

² Taquin co'tan ta stojol Dios, ja' te Dios yu'un te cuxlejale. ¿Bi wan ora ya xtalon xan te ya jtejc'an jba ta stojol te Diose?

³ Ta c'aal, ajc'ubal, ja' jwe'el c'oem ya caiy te ya'lel jsite. Te c'alal jich ayon ae, spisil ora ya sjojc'obonic: “¿Banti ay te Dios awu'une?” xiic.

⁴ Te bi ora ya jna'e, ya xtoy xan ya caiy te jwocole. Ya xtal ta co'tan te bi ora yacon ta bael soc a te ants-winiquetique te ya quic' bael ta templo yu'un Dios, capal ta aw swenta yutsil q'uinal yaiyic soc swenta yalbeyel wocol te Cajwaltique. Mero muc'ul q'uin c'ot yu'unic.

⁵ ¿Bi yu'un ya xpejc'aj co'tan? ¿Bi yu'un te bayal ya x'ayan co'tan? Ja' yacon ta smaliyel te Diose, ya to calbey xan yutsil sc'oplal. Ja' Dios cu'un stuquel, ja' stuquel te jcoltaywanej cu'une.

⁶ Lom bayal ya xpejc'aj co'tan ya caiy. Ja' yu'un bayal ya jna'at c'alal ta sq'uinal muc'ja' Jordán, c'alal ta switsul Hermón soc ta switsul Mizar.

⁷ Ya sjac'bey sba ta aiyel sc'op ta sc'ubulil ch'entiquil soc te sc'op te bay ya xch'ay coel te ja'etique; soc te snojel ja'etic ticunbil awu'une, c'axix ta jba.

⁸ Te Cajwaltique ya sticunbon xc'uxul yo'tan ta c'aaleltic; te jo'one ma jquejch'an jba ta c'ayoj ta jujun ajc'ubal, te jo'one ma jquejch'an jba ta sc'oponel Dios, ja' te Dios yac'ojbon jcuxlejale.

⁹ Ya calbey te Diose, ja' te jcoltaywanej cu'une: “¿Bi yu'un ach'ayojon ta awo'tan? ¿Bi yu'un yacon ta mel-o'tan, soc bi swentail te ay jwocol ta sc'ab te jcontroe?” xoon.

¹⁰ C'alal ta jbaquel c'oem xc'uxul te uts'inel yu'un te jcontrotaque; spisil ora ya sjojc'obonic: “¿Banti ay te Dios awu'une?” xiic.

¹¹ ¿Bi yu'un ya xpejc'aj co'tan? ¿Bi yu'un bayal ya x'ayan co'tan? Ja' ya jmaliy te Diose, ya to calbey xan yutsil sc'oplal. Ja' Dios cu'un stuquel, ja' stuquel te jcoltaywanej cu'une.