Salmos 41 - Bible in Tzeltal de Oxchuc y Tenejapa

La sc'opon Dios mach'a ay ta chamel

¹ Bin nax me yutsil te mach'a ay ta yo'tan te me'baetic te ma'yuc yip te sbaq'uetalique; ya me xcoltayot yu'un Cajwaltic ta yorail woclajel.

² Te Cajwaltic ya me scanantay, ya me yac'bey xcuxlejal; bin nax me yutsil ya xc'ax ta q'uinal, ma x'ac'ot ta sc'ab te scontrotaque.

³ Te Cajwaltic ya me yac'bey yip teme ay ta ajc'an ta swayibe; ya me xc'atp'unbot ta xcuxlejal te xchamele.

⁴ Jich caloj: “Cajwal, na'bon yo'bolil jba, lecubtesawon melel jtaoj jmul ta atojol”, xoon.

⁵ Te mach'atic ay slab yo'tanic cu'un, yo'tanuc ya xbats'ejon ta chamel: “¿Bi ora ya xlaj? ¿Bi ora ya xch'ay sbiil ta q'uinal?” xiic.

⁶ Ya xtal yilon pero ma meleluc ya xc'opojic; sq'uejoj ta yo'tanic te bitic amene, c'alal ya xloq'uic ta calle, ya spuquic ta alel.

⁷ Te mach'atic xti'ton yo'tanic cu'une, ya stsob sbaic, ya yalonic, ya yal ta yo'tanic te scaj jmul te ayon ta chamele.

⁸ Jich ya yalic: “Yat'el pucuj te chamel ya yaiye; metselix ta swayib, ma'yuc bi ora ya xjajch'ix”, xiic.

⁹ Asta te mach'a mero c'ux ya caiy jba soque, te ja' smuc'ul co'tan sc'oplale, ja' te mach'a jun ya xwe'on soque, ja' la scontroinonix.

¹⁰ Pero ja'at Cajwal, na'bon yo'bolil jba, jachawon jajch'el, jich me ya cac'bey stojic.

¹¹ Jich me ya jna' a te lec awo'tan yu'un te bitic jpasoje; te ma xc'ajin yu'un yutsil yo'tan ta tsalaw ta jtojol te jcontroe.

¹² Te jo'on ta spisil ora toj ayon ta atojol; tsacawon ta ac'ab, ac'awon ta ats'eel spisil ora.

¹³ Te Cajwaltic, te Dios yu'un Israel, jelawen yutsil sc'oplal ta ora to soc ta sbajt'el q'uinal. Jichuc.