Salmos 40 - Bible in Tzeltal de Oxchuc y Tenejapa

Ya jmulan spasel bi ya sc'an awo'tane, Dios cu'un

¹ La cac' smuc'ulin co'tan te Cajwaltic, spisil co'tan la jmaliy; jich la yac' tel xchiquin ta jtojol, jich la yaiybon te cawe.

² Melel la scoltayon loq'uel ta muquenal, ma ba la yac'on ta biq'uel ta ts'ajel, la yac'on ta libre stuquel. La yac' tejc'ajucon ta sba muc'ul ton; tulan la yac' jtejc'an jba.

³ La yac'bon ta co'tan yach'il c'ayoj, sc'ayojil yutsilal te Dios cu'untique. Te mach'a la yilic te bila c'ot ta pasele, ay tsobol xiw yo'tanic yu'un, ja' la yipin yo'tanic te Cajwaltique.

⁴ Bin nax me yutsil te mach'a ja' ya smuc'ulin yo'tan te Cajwaltique, te ma ja'uc ya sle sjoin te mach'atic toybae, ni ja'uc ya spajbey yo'tan soc te mach'atic xch'uunejic te lotil diosetique.

⁵ Cajwal, Dios cu'un, mero bayal bitic jelawen yutsil apasoj, ya ana'bon yo'bolil jba soc ayon ta awo'tan. Ma'yuc mach'a pajalat soc. Co'tanuc ya calbey sc'oplal ta alel te bitic apasoje, co'tanuc ya xc'opojon ta yalel, pero ma xju' cu'un sna'el spisil, c'axem jich a te bit'il ya xju' cu'un yalel.

⁶ Te ja'at, ma ja'uc lec awo'tan yu'un milbil amajt'an, soc ma x'ac'an amajt'anin sit awalts'unubil, soc ma x'ac'an amajt'anin te scojt'ol ya yich' chiq'uel, ni ja'uc chic'bil majt'anil swenta stojol mulil. Ja'uc me to la ajambonix jchiquin.

⁷ Ja' yu'un jich la cal: “Li' ayon to, jich nix te bit'il ya yalbon jc'oplal te june.

⁸ Dios cu'un, jo'on ya jmulan spasel te bila ya sc'an awo'tane; quich'oj ta yolil co'tan te mandal awu'une”, xoon.

⁹ La caq'uix ta nopel ta stojol spisil te lum awu'une te bila mero stojil ta pasele. Ja'at ana'oj ta lec, Cajwal, te ma'yuc bi ora quejch'ajemon ta c'ope.

¹⁰ Ma ba jquejch'anej yalel sc'oplal te toj-o'tanil awu'une, la calix te jun awo'tan ta jtojol soc te bit'il ya xcoltaywanate. Ma'yuc bi ora jmucoj ta co'tan te xc'uxul awo'tan soc te smelelil ac'op ta stojol te lum awu'un te c'ax bayale.

¹¹ Cajwal, ma me x'acombon te jc'uxtayel awu'une. Spisiluc me ora ya scoltayon te xc'uxul awo'tan soc te smelelil ya awale.

¹² Melel ay bayal bitic amen yac'ojbon jwocol te ma xju'ix ta ajtayel cu'une. Ja' nix ya spejc'anon te bila amen jpasoje, asta ma xquilix q'uinal yu'un. C'axem jich yipal a te bit'il stsotsil jole; ya xpejc'ajix co'tan yu'un.

¹³ Cajwal, wocoluc, la', coltayawon. Cajwal, la', coltayawon ta ora.

¹⁴ Ac'a yich'ic q'uexlaltesel soc jowtesel te mach'atic ya slebonic jlajele. Q'uexlaltic sba ac'a sujt'uc bael ta spatic te mach'atic ya sc'an ya yuts'inonique.

¹⁵ Ac'a loc'uc ta anel scaj xq'uexlalic te mach'atic ya slabanonique.

¹⁶ Pero spisilic te mach'atic ya sleate, ac'a nojuc ta yo'tanic yutsil q'uinal yaiyic; te jayeb mach'atic ya sc'anic te colel awu'une jich ac'a yalic spisil ora: “Mero muc' te Cajwaltique”, xiic me.

¹⁷ Te jo'on te me'baon te ay jwocol spisil ora, ma me xach'ayon ta awo'tan, Cajwal. Ja'at atuquel te ya acoltayon soc te ya awac'on ta libre; ma me xjalajatix, Dios cu'un, la' me ta ora.