Salmos 39 - Bible in Tzeltal de Oxchuc y Tenejapa

Com nax te cuxlejale

¹ Caloj te ya jtsajtay jbae, caloj te ma jta jmul soc te jc'ope, soc te ya jcom te quee te c'alal ay ta jts'eel te mach'atic amen yo'tanique.

² La jcom jba, ma ba c'opojon, jichuc uma'. Ni ja'uc loc' ta que te bila lec ta alele. Pero bebe toyel te xc'uxul la caiye;

³ mero xpulet c'ajc' ta co'tan la caiy. La jna' ta co'tan, jich toy xan c'ajc' ta co'tan, ja' yu'un jich la cal ta tulan:

⁴ “Cajwal, ac'bon jna' bila slajibal ya xc'ot te jcuxlejale, soc ac'bon jna' jayeb xan ora cuxulon; soc ya jc'an ya jna' jich smuc'ul xan te jcuxlejale.

⁵ Mero com te jcuxlejal awac'ojbone; mero jxujt' c'oem ta atojol te jcuxlejale. Melel spisil ants-winiquetic jich nax c'oem xcuxlejalic te bit'il jic'-o'tanile.

⁶ Spisil ants-winiquetic ya xch'ay c'axel jichuc axinal. Tojol ya yac' swocolic ta stsobel sc'ulejalic, ma ba sna'ojic mach'a ya yich' jilel.

⁷ ¿Bi ya jmaliyix a te jo'one, Cajwal? Ma'yuc. Melel ja'at te smuc'ulat co'tane.

⁸ Pasbon perdón yu'un te jmul jtaoje; ma me xawac' slabanon te mach'atic ma sna'ic q'uinale.

⁹ “La jcom jba, ma ba la jam que jichuc uma', melel ja'at jich la apasbon.

¹⁰ Ma me xamajonix, Cajwal, comaix te ac'abe, ayonix ta lajel yu'un.

¹¹ Ta castigo ya awac' tojobuc te mach'a ya sle smule, ya alajinbey te bila bayal sc'oplal ta yo'tane. Melel jich nax c'oem yorail ants-winiquetic te bit'il jic'-o'tanile.

¹² “Cajwal, aiybon te jc'ope, aiybon te coq'uele. Ma me yacuc nax awilbon te ya'lel jsite, Cajwal. Te jo'one jyanlumon ta atojol, jichon te bit'il jbeom ja'mal mut, jich nix bit'il c'axic te anima jme'-jtate.

¹³ Ijq'uitayawon jilel, ac'bon xan quich' ic', c'alal ma to xlajon, soc c'alal ma to xch'ayon bael ta q'uinal”, xoon ta stojol te Cajwale.