Salmos 37 - Bible in Tzeltal de Oxchuc y Tenejapa

Ja'uc me smuc'ul awo'tan te Cajwaltique

¹ Ma me x'ilin awo'tan yu'un te mach'atic amen yo'tanic; ma me xti'tonuc awo'tan yu'un te mach'atic amen yat'elique.

² Melel ora nax ya xch'ay bael jich bit'il ya xtaquej te aque; ma wocoluc ya xlaj bael, jich te bit'il ya xlaj te nichime.

³ Ja' me ac'a smuc'ulin awo'tan te Cajwaltic, ja' me xapas te bila leque; ainan ta q'uinal soc junuc me awo'tan ta stojol.

⁴ C'uxuc me ta awo'tan te Cajwaltique, ja' me ya yac'bat te bila ya sc'an awo'tane.

⁵ Ac'a aba ta sc'ab Cajwaltic soc acuxlejal; ja' me ac'a smuc'ulin awo'tan te Cajwaltique, ja' me ya xtal scoltayat stuquel.

⁶ Ya me yac' chicnajuc te bila stojil ya apase; jich te bit'il ya xchicnaj xojobil ta olil te c'aale.

⁷ Ch'aban me ta stojol Cajwaltic; junuc me awo'tan ta smaliyel te ya scoltayat stuquele. Ma me x'ilin awo'tan yu'un te mach'a ay lec bitic ya sta ta q'uinale, te mach'a ay bila amen te ya xchape.

⁸ Ijq'uitaya te ilimba, ma me xc'ajc'ubix awo'tan; ma me x'ilinat, melel ya me ata awocol yu'un.

⁹ Melel te mach'atic amenic ya me yich'ic loq'uesel ta sq'uinalic, yan te mach'atic ja' ya smuc'ulin yo'tanic te Cajwaltique, ya me yu'uninic te q'uinal stuquelique.

¹⁰ Nopol ya xch'ay bael te mach'atic amenique; Manchuc me ya ale, pero ma ba ya ataix ta leel.

¹¹ Yan te mach'atic peq'uel ya yac' sbaic, ya me sq'uinalinic te q'uinale, buen lamal me q'uinal ya yaiybeyic yutsilal stuquelic.

¹² Te mach'a amen yo'tan ya xchap bi ya yut ya slebey swocol te mach'a lec yo'tane, ya xc'ux ye yu'un slab yo'tan ta stojol.

¹³ Pero ya me stse'luyot yu'un Cajwaltic, na'bil yu'un te nopol ya xlajix yoraile.

¹⁴ Te mach'atic amen yo'tanic ya sloq'ues spuñalic yu'un slajinel te mach'atic me'baetic, soc ya snitic te st'imalte'ic yu'un slajinel te mach'atic te pejc'ajtic; melel ya smilic ta sc'opic a te mach'atic lec yat'elique.

¹⁵ Pero ja' ni me ya yich' lowbeyel yo'tanic a te spuñalique, soc ya yich' c'astilayel te st'imalte'ique.

¹⁶ Manchuc me jtebuc nax sbiluc te mach'a lec yo'tane, pero buen lec me stuquel; yan te bayal sc'ulejal te mach'atic amen yo'tanique, ma'yuc swentail stuquel.

¹⁷ Melel te Cajwaltic ya yac'bey slajibal stuquel te mach'atic amen yo'tanique; yan te mach'atic lec yo'tanic, ya me stsac ta yu'el stuquel.

¹⁸ Te Cajwaltic ya me scanantay te mach'atic lec yat'elic, soc stalel me ay stuquel te bila ya x'ac'bot yu'uninique.

¹⁹ Teme bolob balumilal, teme tal wi'nal, ma ba ya staic q'uexlal, melel ts'acal me ya sta swe'el stuquelic.

²⁰ Te mach'atic amen yo'tanic ya me xtilic jichuc taquin ac stuquelic; te mach'atic scontroinejic te Cajwaltique jich me ya xch'ayic bael te bit'il ya xch'ay bael te ch'aile.

²¹ Te mach'a amen yo'tan ay bila ya smajan, pero ma sc'an ya sujt'es; yan te mach'a lec yo'tan ya sna'bey yo'bolil sba, ay bila ya yac'bey stuquel.

²² Te mach'atic ya x'ac'botic bendición yu'un Cajwaltic, ya me x'ac'bot sq'uinalinic te q'uinale; pero te mach'atic ma lecuc sc'oplalic yu'un, ya me xlajic stuquelic.

²³ Te Cajwaltic ja' me ya stojtesbey yacan ta beel te ants-winique, ya yac'bey st'un bael te be te ya smulan stuquele.

²⁴ Manchuc me ya xyal, pero ma ba yalem ya xjil, melel ja' tsacbil ta sc'ab yu'un te Cajwaltique.

²⁵ Queremon te nameye, yo'tic mamalonix, pero ma'yuc bi ora la quil pijt'esot yu'un Dios te mach'a lec yo'tane, soc ma'yuc bi ora la quil yacal ta c'anbajel te snich'nabe.

²⁶ Ta spisil ora ya sna'bey yo'bolil sba yantic, soc ay bi ya yaq'uic ta majanel. Swenta bendición c'oem te snich'nabe.

²⁷ Ijq'uitaya jilel te bila amen, ja' xapas te bila leque, jich me ya ata awawil ta banti ya xnainat spisil ora.

²⁸ Melel te Cajwaltic ja' ya smulan te bila stojil ta pasel. Ma ba ya spijt'es te mach'a jun yo'tan ta stojole; yan te mach'atic amen yo'tanic ya slajin stuquel, jc'axel ya slajinbey sts'umbal.

²⁹ Te mach'atic lec yo'tanic ya me sq'uinalinic te q'uinale, sbajt'el me q'uinal ya xnainic tey a.

³⁰ Te mach'a lec yo'tan, ay me sp'ijil ya xc'opoj stuquel; te mach'a lec yo'tan, mero stojil me ya xc'opoj.

³¹ Yich'oj ta yo'tan te bila ya x'ac'bot snop yu'un te Dios yu'une; ma'yuc bi ora ya xyal c'oem stuquel.

³² Te mach'a amen yo'tane ya snac' sba ta smacliyel te mach'a lec yo'tane, yu'un snopoj ta yo'tan te ya smile;

³³ pero te Cajwaltic ma xyac' ochuc ta sc'ab, ma xyac' te ya x'ac'bot castigo te c'alal ya yich' chajbanel.

³⁴ Te ja'at ja' me ac'a smuc'ulin awo'tan te Cajwaltique, ch'uunbeya smandal; melel ya me yac' toyuc ac'oplal, soc ya me yac'bat awu'unin te q'uinale. Ya me yil asit te ya yich' lajinel te mach'atic amen yo'tanique.

³⁵ Ay quiloj te mach'a amen yo'tane, mero bayal stoyoj sba, jich scuyoj sba te bit'il muc'ul te' te bayal sc'ab soc te bayal yabenale;

³⁶ pero patil laj bael; la jle, ma ba la jta ta leel.

³⁷ Ja' me x'awil te mach'a lec sc'oplal soc te lec yat'el, melel te bila ya xc'ot ta swenta, ja' te lamal q'uinale.

³⁸ Yan te mach'atic jc'axin-c'opetique jc'axel me ya yich'ic lajinel stuquelic; te bila quechel ya xc'ot ta stojolic te mach'atic amen yo'tanique ja' me te slajibique.

³⁹ Te coltayel ya xjul ta stojolic te mach'atic lec yo'tanic, ja' ya yac' tel te Cajwaltique, ja' me ya sta yipic yu'un ta yorail teme ay bila chujc'ul ae.

⁴⁰ Te Cajwaltic ya me xcoltayotic ta anel yu'un; ya scoltay ta sc'abic te mach'atic amen yo'tanic; melel ya sle scolelic ta stojol te Cajwaltique;