Salmos 36 - Bible in Tzeltal de Oxchuc y Tenejapa

Smul ants-winic, soc xc'uxul yo'tan Dios

¹ Te mulil ya xc'opoj soc ta mero yutil yo'tan te mach'a amene. Ma'yuc bi ora ay ta yo'tan te ja'uc ya sc'an xi'el te Diose.

² Ja' nax ya sc'an yo'tan te ja'uc ya yich' alel te lec sc'oplal stuquel, te manchuc ya xtaot ta ilayel soc te bitic amen ya spase.

³ Bol c'op soc pas-lot ay ta yo'tan, la xch'ay ta pasel te bila toje, la yijq'uitay ta pasel te bay leque.

⁴ Metsel ta wayel a, ya snop ta yo'tan spasel te bila amene; stsacoj ta jyalel te amen be, ma sc'an yijq'uitay ta yo'tan te bila amene.

⁵ Yan te xc'uxul awo'tan, Cajwal, jich c'oem stoylejal te bit'il ch'ulchan; ma'yuc slajibal te jun awo'tan ta jtojole, staojbey c'oem syaxal te ch'ulchane.

⁶ Te stojil awo'tan jich c'oem stoylejal te bit'il muc'ul witstiquile; te c'opetic te achapoj ta awo'tan jich c'oemic te bit'il muc'ul mar te c'ax najt' coel te sna'bilale. Te ja'at, Cajwal, ya acanantay te ants-winiquetic soc te chambalametique.

⁷ Dios cu'un, jchajp nax ta jyalel a te xc'uxul awo'tane, te mach'atic ya sleic te canantayel awu'une, ya awac' ta yet'al axic' c'oem.

⁸ Jc'axel mero nojel xch'ujt'ic ya xjilic yu'un te c'ax bayal te we'elil ta anae; te ja'at ya awac'bey yuch'ic ja' ta muc'ja' te jelawen yutsile,

⁹ melel te ja'ate ay ta awenta jichuc sloq'uibja' te cuxlejale. Ta swenta axojobil ya xtojobon.

¹⁰ Spisil me ora ac'a xc'uxul awo'tan soc stojil awo'tan ta stojol te mach'atic ya sna'bat abae, ja' te mach'atic toj yo'tanique.

¹¹ Ma xawac' spech'on ta teq'uel te mach'atic toyol yac'oj sbaique; ma me xquich' chijch'anel ta uts'inel yu'un te mach'atic amenique.

¹² Ilawilic bit'il ya xyalic te mach'atic amen yat'elique. Ac'a yaluquic, ma me xjajch'iquix.