Salmos 35 - Bible in Tzeltal de Oxchuc y TenejapaSc'anel coltayel yu'un Cajwaltic 1 Cajwal, controina te mach'atic ya scontroinonique; ac'beya guerra te mach'atic ya yac'bonic guerra. 2 Ich'a tel amajq'uil, la' me ta jtojol, coltayawon; 3 ich'a tel alanza, la', nujp'usitaya aba soc te mach'atic ya yuts'inonique. Albon ta jtojol te ja'at jcoltaywanejat cu'une. 4 Bajt'uc ta anel yu'un q'uexlal te mach'atic ya sc'an ya smilonique; bajt'uc ta anel yu'un q'uexlal te mach'atic ay bila ya sc'an ya spasbonique. 5 Jichuc me c'oemic te bit'il ac te ya xlicotic bael yu'un ic'; ac'a yich'ic ch'ojel bael yu'un ch'ul abat yu'un te Cajwaltique. 6 Ijc'ubuc q'uinal soc bilubuc te sbee; te ch'ul abat yu'un Cajwaltic, ac'a snuts bael. 7 Ma'yuc bila swentail te la yac'bonic jyaquile; ma'yuc bila swentail la sjoq'uic ch'en swenta yu'un ya xch'ayon bael ta sc'opic a. 8 Ja'uc ni me ch'ayem yo'tanic a te ya xc'ot ta swentaic te woclajele; ja'uc me ac'a yaluquic ta bay te syaquique, ja'uc ni me ac'a yaluquic ta bay te woclajele. 9 Ja' yu'un ay me yutsil co'tan ta swenta Cajwaltic, melel ja' la scoltayon. 10 Ta spisil co'tan jich ya cal: “¿Cajwal, ay bal yan mach'a jich a te bit'ilate? Te mach'atic me'baetique, ja' te mach'atic ma'yuc bila ya xtuun yu'unique, ya awac' ta libre yu'un te mach'atic tulanique, ja' te mach'atic yacalic ta uts'inwanej ta stojolique”, xoon yu'un. 11 Ya yac' sbaic ta testigo te mach'atic amenique, soc ya sjojc'obonic te bitic ma jna'e. 12 Te bila lec la jpasbeye, ja' la sujt'esbonic a te bila amene, ja' te ya yac'bon bayal mel-o'tane. 13 Te c'alal tsacotic ta chamele, la cac' jba ta woclajel ta swentaic, la jlap ch'ixal pac', soc la jcom jwe'el, soc ma la jcom jba ta sc'oponel Dios ta co'tan yu'un. 14 Ayon ta mel-o'tan soc ma'yucon ta q'uinal la caiy yu'un; jich c'oemon te bit'il jlapoj ijc'al pac' yu'un mel-o'tan ta swenta te laj te jme', o jtul joy, o jtul mero quermano. 15 Yan te c'alal tal wocol ta jtojole, spisilic la stsob sbaic tel ta stse'lubelonic; jich c'oon ta yo'tanic te bit'il jyanlum te ma sna'bonic jbae. Ma la scom sbaic, c'ax bayal la yuts'inonic. 16 La yac'bonic c'axuc jwocol, la slabanonic; la yac' tel sit yilbelonic, bayal slab yo'tanic. 17 Cajwal, ¿jayeb to xan c'aal ya awilulay bael? Coltaybon te jcuxlejal, te cuxulon ae; ja' león-chojetic c'oem, yacalic ta aw bael. 18 Ya calbat wocol ta atojol ta sit te lum awu'un te c'ax bayal ta jyalele; ya calbat yutsil ac'oplal ta sit te bayal ants-winiquetique. 19 Ma me binuc nax yo'tanic ta jtojol te jcontrotaque; ma me sts'esitayon te mach'atic ma'yuc swentail te ya yilayonique. 20 Melel ma ja'uc ya sleic te lamal q'uinale; ja' ya xchajbanic te muquen bila ya spasic ta stojol te mach'atic lamal yo'tanic ta jlumale. 21 Muc' nax ya sjam yeic yu'un slabanbelonic, jich ya yalic: “Ilawilic”, xiic ta jtojol. 22 Cajwal, ya ana' atuquel. Ma me jichuc nax ya xch'ay ta awo'tan; ma me c'ubuluc xawac' aba ta jtojol. 23 Cajwal, jajch'an tel; Dios cu'un, wic'a asit. Chajbanawon, c'opojan cu'un. 24 Cajwal, chajbanawon, Dios cu'un, te bit'il toj awo'tan atuquele. Ma me stse'luyonic. 25 Ma me xyalic ta jamal, ni ta yo'tanic: “Ja' la sc'an co'tantic. La jintiquix ta jc'axel”, ma me xiuquic. 26 Ac'a potsotuc yu'un xq'uexlalic te mach'atic bin nax yo'tanic yu'un te jwocole; jc'axel ac'a potsotuc jilel yu'un xq'uexlalic te mach'atic cajal yac'oj sbaic ta jtojole. 27 Te mach'atic ya sc'an yilonic te ya caiy tsalawe, ac'a me bujts'najuc yo'tanic yu'un, ac'a awunuquic soc yutsil yo'tanic. Jichuc ac'a yalic ta spisil ora: “Te Cajwaltic muc' stuquel soc lec yo'tan yu'un slequilal te yabate”, xiuquic me. 28 Ya me cal te toj awo'tane; spisil me c'aal ya calbat yutsil ac'oplal. |
Biblia en Tzeltal de Oxchuc y Tenejapa © Sociedad Bíblica de México, A.C., 2001.
Bible Society of Mexico