Salmos 34 - Bible in Tzeltal de Oxchuc y Tenejapa

Albeyel sc'oplal yutsil yo'tan Cajwal

¹ Ya calbey yutsilal sc'oplal Cajwal ta spisil ora; ya me xloc' ta que ta yalbeyel sc'oplal spisil ora.

² Te jo'one toyem q'uinal ya caiy yu'un te Cajwale; te ja'ex te peq'uelexe, aiya awaiyic stojol, binuc nax me awo'tanic yu'un.

³ Jun nax me ya cac' jbatic ta stoyesel sc'oplal Cajwaltic te stalel ay ta ich'el ta muq'ue.

⁴ La jle te Cajwale, la stsacbon jc'op, jich jilon ta libre yu'un spisil te xiwele.

⁵ Te mach'atic ya yilic Cajwaltic ya xnoj jilel yutsil yo'tanic, soc ma'yuc bi ora ya x'ac'otic ta q'uexlal.

⁶ Awun te mach'a obol sbae, te Cajwaltic la yaiy stojol; jich la yac' ta libre yu'un spisil te swocole.

⁷ Te ch'ul abat yu'un Cajwaltic ya scanantay soc ya scoltay te mach'atic ya yich'ic ta muc' te Cajwaltique.

⁸ Pasaic prueba te Cajwaltic, soc ilawilic te ja' mero lec stuquel. Bin nax yutsil te mach'a ya smuc'ulin yo'tane.

⁹ Ich'aic ta muc' te Cajwaltic, ja'ex te yu'unex stuquel; ma me ayuc bi falta ya yaiy ta yo'tan te mach'atic ya yich'ic ta muq'ue.

¹⁰ Te jc'ulejetic ya me xc'atp'ujic ta me'ba, soc ya me xwoclajic yu'un wi'nal; yan te mach'atic ya sle te Cajwaltic, spisil bila lec, ay me yu'unic stuquel.

¹¹ La'ic, cal-jnich'nab, aiybon awaiyic stojol jc'op; ya jp'ijubtesex ta yich'el ta muc' te Cajwaltique.

¹² ¿Ya bal ac'an xcuxinat bayal c'aal? ¿Ya bal ac'an awaiybey yutsilal te acuxlejale?

¹³ Coma awe ta yalel bol c'op jiche, soc ma me xawal lotil c'op.

¹⁴ Coma aba ta spasel te bila ma lecuque; ja' xapas te bitic leque. Ja' xale te lamal q'uinale; at'elina spasel.

¹⁵ Te Cajwaltic ya scanantay te mach'atic toj yo'tanique, soc ya yaiybey stojol sc'opic te c'alal ya yawtayique.

¹⁶ Te Cajwaltic contro ya yil te mach'atic ma lecuc yat'elic, ya me stup'bey ta balumilal te sna'jibalique.

¹⁷ Te Cajwaltic yat'elinej yaiybel sc'op te mach'atic toj yo'tanique, soc ya yac' ta libre yu'un spisil te swocolique.

¹⁸ Te Cajwaltic nopol ay ta scoltayel te mach'atic lajemiquix ya yaiyic, te ma'yuquix bi ya smaliyique.

¹⁹ Te mach'a toj yo'tan, ay swocol yu'un te bitic amene; ja'uc me to, te Cajwaltic ya scoltay loq'uel ta spisil.

²⁰ Te Cajwaltic ya scanantaybey spisil te sbaquele; ma'yuc ni jch'ixuc sbaquel ya xc'asbot.

²¹ Te mach'atic amenic ja' nix ya xmilot yu'un te bila amen ya spasique; te mach'atic ya yilay te mach'a toj yo'tane ya me yich'ic castigo.

²² Ja'uc me to, te Cajwaltic ya scoltaybey xcuxlejalic te abatetic yu'une; ma ba ya yich'ic castigo te mach'atic ja' ya smuc'ulin yo'tanique.