Salmos 33 - Bible in Tzeltal de Oxchuc y Tenejapa

Yutsil sc'oplal soc yalbeyel wocol Cajwaltic

¹ Awunanic soc sbujts' awo'tanic ta stojol Cajwaltic, ja'ex te lec awo'tanique; t'ujbil sc'opic mach'atic te lec yo'tanique, t'ujbil yutsil ya yalbey sc'oplal Cajwaltic.

² Albeyaic wocol Cajwaltic soc arpa, c'ajintaybeya c'ayojetic soc música,

³ c'ajintaya yach'il c'ayoj, tijaic lequil músicaetic ta yalbeyel wocol.

⁴ Te sc'op Cajwaltic smelelil stuquel; ta spisil te yat'el spasoje ya yac' ta na'el te jun yo'tan ta jtojoltique.

⁵ Te Cajwaltic bin nax yo'tan yu'un te toj-o'tanil soc te bila toj ta pasele; te xc'uxul yo'tan, nojel ta spamal balumilal.

⁶ Te ch'ulchan soc spisil te bitic ay yu'une, ja' la spas te Cajwaltic ta swenta sc'op soc ta swenta ic' te loc' ta yee.

⁷ Ja' ya stsobey ya'lel mar soc ya yac' ta q'uejel te sna'bilale.

⁸ Ich'aic ta muc' te Cajwaltic, apisilic te ayex ta q'uinale; ich'aic ta muc' apisilic te ayex ta balumilale.

⁹ C'alal c'opoj te Cajwaltique, jich pastaj ta spisil; ja' la spas mandal stuquel, jich toj ts'unaj jilel ta spisil.

¹⁰ Te Cajwaltic ya stup'bey ta jc'axel te bila xchapoj te lumetic te ma'yuquic ta stojol Dios;

¹¹ ja'uc me to, te bitic xchapoj stuquel te Cajwaltic, stalel ts'unul sbajt'el q'uinal.

¹² Bin nax yutsil te lum te ja' Dios yu'un te Cajwaltique, ja' te lum stsaoj te yu'uninej stuquele.

¹³ Te Cajwaltic ya yil tel c'alal ta ch'ulchan soc ya yil ta spisil te ants-winiquetique;

¹⁴ c'alal ta awilal ta ba ay, ya yil tel te mach'atic ayic ta balumilal;

¹⁵ melel ja' stuquel te la xchajbanbey te yo'tanic, soc ja' nix yac ta yilel ta spisil te bitic ya spasique.

¹⁶ Ni jtuluc muc' ajwalil ya xcoltayot yu'un te bayal ta jyalel te soldadoetic yu'une; ni jtuluc ya xcoltayot yu'un te mach'atic muq'uic te bayal yipique.

¹⁷ Te caballoetic ma xtuunic, ma'yuc mach'a ya xcol yu'un; manchuc me bayal yipic, ma xju' xcoltaywanic.

¹⁸ Yan te Cajwaltic spisil ora ya scanantay te mach'atic ya yich'ic ta muc' soc te ja' smuc'ulinej yo'tanic te xc'uxul yo'tane,

¹⁹ swenta yu'un ya scoltay ta lajel soc ya me yac'bey bitic ya xcuxinic a ta yorail te wi'nale.

²⁰ Te jo'otic smuc'ulinej co'tantic te Cajwaltique, ja' ya scoltayotic soc ja' jmajq'uiltic.

²¹ Bin nax co'tantic ta swenta Cajwaltic; melel smuc'ulinej co'tantic ta jyalel te xch'ul yutsil yo'tane.

²² Cajwal, ac'a sjoinotic te xc'uxul awo'tane, jich bit'il yacotic ta smaliyel.