Salmos 32 - Bible in Tzeltal de Oxchuc y Tenejapa

La yal ta jamal smul, jich la sta perdón

¹ Bin nax yutsil te mach'a pasbilix perdón yu'un te smule, te jc'axel ch'aybotix te faltaetic yu'une.

² Bin nax yutsil te mach'a ma'yuc lo'laywanej ta yo'tan, soc te ma'yuc falta ya x'ac'bot scuch yu'un te Cajwaltique.

³ C'alal ma to caloj ta jamal a te jmule, te jbaq'uetale yac nax ta lajel yip ta scaj te coq'uel spisil ora;

⁴ c'aal ajc'ubal la caiybat yalal te ac'abe. Jich taquejon te bit'il nichim te ya xtaquej ta yorail verano, jich lubajon la caiy.

⁵ Ja'uc me to, la calbat ta jamal, ma ba la jmuquix ta co'tan te jmule, ja' te bila ma lecuc jpasoje; la jnop te ya calbat ta jamal te muliletic jpasoje, te ja'at Cajwal, la apasbon perdón yu'un.

⁶ Jich yu'un te c'alal ay woclajel ya yaiyique, te mach'atic toj yo'tanic ya sc'oponat; manchuc me ya xtal bayal snojel ja'etic, ma xtaotic c'oel yu'un.

⁷ Ja'at anjibalat cu'un; te woclajel ma xawac' staon, ya ajoytayon ta awetic yu'un tsalaw.

⁸ Te Cajwaltic ya yal: “Cac'oj jsit ta atojol. Jo'on ya cac'bat p'ijubtesel, ya cac'bat tojtesel, ya cac'bat awil te be te ya sc'an ya at'une.

⁹ Ma me jichucat te bit'il macho soc caballo, te ma'yuc sp'ijil yo'tanique, te ja' to ya yich' comel yip a ta sfrenoil ye soc ta snitjibal; teme ma jichuc ya apasbey, ma xch'uun mandal awu'un”, xi' te Cajwaltique.

¹⁰ Te mach'atic amenic ya me yaiybeyic bayal xc'uxul; ja'uc me to, te xc'uxul yo'tan Cajwaltic ya me spots a te mach'atic ya smuc'ulin yo'tanique.

¹¹ Binuc nax me awo'tanic ta swenta te Cajwaltic, ja'ex te toj awo'tanic soc te lec bitic ya apasique. ¡Binuc nax me awo'tanic soc awunanic yu'un!