Salmos 30 - Bible in Tzeltal de Oxchuc y Tenejapa

C'ayoj ta yalel wocol ta stojol te Cajwaltic

¹ Cajwal, ya calbat yutsil ac'oplal, melel ja'at la awac'on ta libre; ma xawac' te ya slabanon te jcontrotaque.

² Cajwal, Dios cu'un, la jc'anbat coltayel, jich la alamantesbon te jchamele;

³ te ja'at Cajwal, la acoltayon ta yawil lajel; la awac'bon jcuxlejal, jich libre c'oon yu'un te lajele.

⁴ Ja'ex te junajem awo'tanic ta stojol Cajwaltic, c'ajintayaic ta c'ayoj, albeyaic yutsil te xch'ul-biile.

⁵ Melel buelta nax stuquel te yilimbae, yan te c'uxtayel yu'une sbajt'el q'uinal ay stuquel. Teme ya x'oc'otic ta ajc'ubal, ja'uc me to, ayix yutsil q'uinal ya caiytic ta sacubel q'uinal.

⁶ Te c'alal ma'yuquix wocol, jich la cal: “Ma'yuc mach'a ya syaleson”, xoon.

⁷ Te ja'at Cajwal, ta swenta yutsil awo'tan la anajc'anon ta tulan jich bit'il wits. La sta yorail te ma la acoltayon, jich la sjowteson te xiwele.

⁸ Te ja'at Cajwal, tulan ya jc'oponat; te ja'at Cajwal, ya calbat wocol:

⁹ “¿Bi ya jta xan a teme lajone te ya xboon ta muquenal ch'ene? Te ts'ubil lume ma xju' ya yalbatix yutsil ac'oplal, ma xyal te bila smelelil ac'oplale.

¹⁰ Cajwal, aiybon awaiy stojol jc'op, na'bon me yo'bolil jba; Cajwal, coltayawon”, xoon.

¹¹ Te oq'uel la ajelbonix ta ajc'ot; la aloq'uesbonix te ch'ixal pac' jlapoj, ja' la awac'bonix jlap te pac' swenta q'uin.

¹² Jich yu'un, Cajwal, Dios cu'un, ma xju' ya xcomon ta c'op ta atojol; ya me jc'ajintayat ta c'ayojetic ta yalel yutsil ac'oplal, soc spisil me ora ya calbat wocol.