Salmos 29 - Bible in Tzeltal de Oxchuc y Tenejapa

Yu'el sc'op Cajwaltic

¹ Albeyaic yutsil sc'oplal Cajwaltic, ja'ex te ayex ta ch'ulchane; albeyaic yutsil sc'oplal te yu'el soc te yutsil xojobil te Cajwaltique.

² Albeyaic yutsilal sbiil; quejana abaic ta stojol ta bay t'ujbil ch'ul templo yu'un.

³ Te sc'op Cajwaltic ya xchicnaj ta aiyel ta sba mar; te Dios jelawen yutsil ya st'omes chawuc; te Cajwaltic ay ta sba sjamalul te mare.

⁴ Te sc'op Cajwaltic tulan ta jyalel; te sc'op Cajwaltic ay yu'el;

⁵ te sc'op Cajwaltic ya swuy te cedroetique. Te Cajwaltic ya swuy te cedroetic yu'un Líbano.

⁶ Ya yac' nijc'uc te witstiquil ta Líbano soc ta Sirión; ya yac' wiluc jichuc toroetic soc jichuc alal wacaxetic.

⁷ Te sc'op Cajwaltic ya swiles loq'uel c'ajc';

⁸ te sc'op Cajwaltic ya yac' nijc'uc te jochol taquin q'uinale; te Cajwaltic ya yac' nijc'uc te jochol taquin q'uinal yu'un Cades.

⁹ Te sc'op Cajwaltic ya syuq'uilay te jijte'etique, jc'axel ma'yuquix te'etic ya xjil yu'un ta ja'mal. Ta templo yu'un, spisilic me ya yich'ic ta muc'.

¹⁰ Te Cajwaltic ja' smandal te ya xtal ja'al; te Cajwaltic ja' ya xmandalaj, melel Ajwalil sbajt'el q'uinal stuquel.

¹¹ Te Cajwaltic ya yac'bey yip te lum yu'une; te Cajwaltic ya yac'bey bendición ta swenta lamal q'uinal te lum yu'une.