Salmos 28 - Bible in Tzeltal de Oxchuc y Tenejapa

Cajwaltic ya yaiy stojol te ya calbeytic wocol

¹ Cajwal, jcanantaywanejat cu'un, atuquel ya jc'oponat. Ma me wocoluc ya ajac'bon te jc'ope. Teme wocol ya ajac'bon te jc'ope, lajemonix abi, ja' pajalonix soc te mach'atic ya xcoiquix bael ta muquenale.

² Aiybon awaiy caw te c'alal ya jc'anbat te jcoltayele, ja' te c'alal ya jtoy bael jc'ab ta stojol te ch'ul templo awu'une.

³ Ma me pajaluc ya atason bael soc te mach'atic amenique; ma me xc'ot ta jwenta awu'un te bila ya xc'ot ta swenta te mach'atic amen yat'elique. Tojol nax te t'ujbil ya xc'opojique, melel ta yutil yo'tanic nojel ta mulil.

⁴ Ac'beya stojic te bit'il nix ya sc'ane, jich nix te bit'il amen te yat'elique; ac'beya stojic te bit'il nix te stojole, jich nix te bila amen spasojique.

⁵ Ma'yuquix ta yo'tanic te bitic spasoj te Cajwaltique; ac'a sjin ta jc'axel stuquel, ma me xcha'jajch'es xan.

⁶ Bin nax yutsil te Cajwaltic te la yaiybon stojol te la calbey wocole.

⁷ Te Cajwale ay yu'el soc ja' jmajq'uil stuquel; jelawen to xan la smuc'ulin co'tan, jich la scoltayon. Bin nax co'tan yu'un; ya jc'ajintay soc ya calbey wocol yu'un te Cajwale.

⁸ Te Cajwal ja' me yipic te lum yu'une; ja' ya scoltay, soc ja' ya xc'opoj yu'un te muc' ajwalil stsaoje.

⁹ Cajwal, coltaya te lum awu'une, ac'beya bendición te mach'atic awu'unineje. Canantaya me, jich bit'il te jcanan-chije; peta ta ac'ab spisil ora.