Salmos 27 - Bible in Tzeltal de Oxchuc y Tenejapa

Te Cajwale, sacuben q'uinal ta jtojol yu'un, soc ja' Jcoltaywanej cu'un

¹ Sacuben q'uinal ta jtojol yu'un te Cajwale, soc ja' Jcoltaywanej cu'un stuquel. ¿Mach'a a te ya jxi'e? ja' ya xc'opoj te Cajwal yu'un te jcuxlejale; ¿mach'a a jiche te ya jxi'e?

² Te mach'atic amen yo'tanic, soc te jcontrotaque, ya stsob sbaic tel yu'un ya smilonic; ja'uc me to, ja'ic nix la sc'ojch'in sbaic, jich ya xyalic.

³ Manchuc teme bayal soldadoetic ya sjoytayonic, ma me xiw co'tan yu'un; manchuc me ya xchajban sbaic yu'un yuts'inbelonic, jtalel jun nax co'tan ya xjilon.

⁴ Jun nax te bila jc'anojbey te Cajwaltique, jun nax te bila sc'anoj te co'tane: ja' te ya x'ainon ta templo yu'un te Cajwaltic te jayeb c'aal cuxulone, swenta yu'un ya me jquejan jba ta templo yu'un, soc ya me jmulanbey a te yutsilal te c'alal ya quile.

⁵ Te c'alal ya xc'ot yorail woclajel, te Cajwal ya yaxinteson ta yu'el ta templo; ta mero yaxinal ya scanantayon. Ya me yac'on ta sba te muc'ul tontiquil wits te ya scoltayone.

⁶ Jich me toyol ya xc'oon ta stojol te jcontrotaque; jich me ya xju' ya cac' milbil majt'anil ta templo, ya me x'awunon yu'un sbujts' co'tan soc ya me jc'ajintay te Cajwaltique.

⁷ Cajwal, ya jc'oponat, aiybon awaiy stojol te jc'ope. C'uxtayawon, jac'bon te jc'ope.

⁸ Jich ya yalbon te co'tane: “Lea te Cajwaltique”, xi'. Jich yu'un, Cajwal, ya me jleat.

⁹ Ma me q'uejeluc ya awac' asit ta jtojol, ma me xach'ayon ta awo'tan soc awilimba; melel ja'at atuquel te Jcoltaywanejat cu'une. Ma me x'awijq'uitayon jilel jtuquel te ma'yuc coltayel ta jtojol awu'une; melel ja'at Diosat te Jcoltaywanejat cu'une.

¹⁰ Manchuc me ya spijt'eson te jtate te jme'e, yan te ja'at Cajwal, ya awentainon atuquel.

¹¹ Cajwal, ac'bon quil te be awu'une; ic'awon bael ta lequil be ta bay ma staon te jcontrotaque.

¹² Ma xawac'bey spas sc'anjel yo'tanic ta jtojol, yu'un ay jajch'emiquix ta jtojol lotil testigoetic te tojol nax ya yuts'inonique.

¹³ Ja'uc me to, xch'uunej co'tan te ya sta yorail te ya quilbey yutsil yo'tan Cajwal te jayeb c'aal ayon ta balumilale.

¹⁴ Ayuc me smuc'ul co'tan yu'un te Cajwale; Ya me jpas tulan, ma me xpejc'aj te co'tane. Jc'axel me ya yac'bon smuc'ul co'tan te Cajwale.