Salmos 26 - Bible in Tzeltal de Oxchuc y Tenejapa

Lec ya xc'oon yu'un te lec jcuxlejal

¹ Cajwal, chajbanawon, te jcuxlejal ma ba boloben. Te ja'at Cajwal, smuc'ulat co'tan, ma chebuc co'tan ta atojol;

² tsajtaybon te co'tane, pasawon ta prueba. Pasbon ta prueba te bila ya jnop soc te bila ya yal te co'tane.

³ Ay ta jtojol te xc'uxul awo'tane, jun co'tan ta atojol spisil ora;

⁴ ma'yuc la join te jpas-lotetique, ma ba jun co'tan jba soc te jcheb-o'tanetique.

⁵ Ya quilay te tsoblej yu'unic te mach'atic amen yo'tanique; mero ma'yuc la join jba soc te mach'atic bol yo'tanique.

⁶ Pocbilix c'oem te jc'ab, ma'yuquix te jmule. Cajwal, ya jc'an xnoptsajonix bael ta bay scajtijib amajt'an,

⁷ yu'un ya jc'ajintay te yutsil ac'oplal, soc ya me cal ta jamal te jchajp at'eliletic awu'une.

⁸ Cajwal, mero toyol co'tan yu'un te templo awu'un ta bay nainemate, ja' te awilal te bay xojobajem te awutsilale.

⁹ Ma me pajaluc ya apojbon jcuxlejal soc te jmulawiletique; ma me xawac' xc'ot ta jwenta te bila ya xc'ot ta swenta te milawaletique,

¹⁰ ja' te mach'atic nojel sc'ab yu'un te mulile, te nojel sc'ab yu'un smajt'an ta leaw ta c'op.

¹¹ Yan te jcuxlejal ma ba boloben; coltayawon, na'bon me yo'bolil jba.

¹² Teq'uelon ta bay tulan lumq'uinal; te Cajwaltic ya me calbey yutsilal ta stojol te lum yu'une.