Salmos 25 - Bible in Tzeltal de Oxchuc y Tenejapa

Sc'anel tojtesel yu'un Dios

¹ Cajwal, ya me jc'oponat;

² Dios cu'un, ja'at smuc'ulat co'tan. Ma xawac' xq'uexawon; ma me stse'luyon te jcontrotaque.

³ Ma me ayuc bi ora ya xq'uexaw jtuluc te mach'atic smuc'ulinejat yo'tanique. Ja'uc me c'otuc q'uexlal ta stojolic te mach'atic ma'yuc swentail ya stoy sbaic ta atojole.

⁴ Cajwal, ac'bon quil te beetic; tojtesawon bael ta beetic awu'une;

⁵ tojtesawon, beentesawon bael ta bay te bila smelelil awu'une. Melel ja'at Diosat soc jcoltaywanejat cu'un; smuc'ulat co'tan ta spisil ora.

⁶ Cajwal, na'a me te xc'uxul awo'tan soc te t'ujbil yutsil awo'tan te ya awac'botic quiltic spisil ora stuquele.

⁷ Ja'uc me to, ma me x'ana'bonix te muliletic cu'une, ma me x'ana'bonix te bitic amen la jpas ta calalil toe. Cajwal, na'awon ta swenta smuc'ul xc'uxul awo'tan soc te yutsil te awo'tane.

⁸ Te Cajwaltic mero lec soc toj stuquel; ya stojtesbey yo'tanic te jmulawiletique,

⁹ soc ya stojtes ta be te mach'atic peq'uelique, ya yac'bey snop te bitic toj ta pasele.

¹⁰ Spisil te beetic yu'un Cajwaltic ay xc'uxul-o'tanil soc te bila melele. Ay ta swenta te mach'atic ya xch'uunic te trato soc te mandaliletic yu'une.

¹¹ Cajwal, muc' te jmule, pasbon perdón; ac'a ta ich'el ta muc' te abiile.

¹² Te mach'a ya yich' ta muc' te Cajwaltique, ja' ya x'ac'bot yil yu'un te be te ya st'une;

¹³ ya me xbusanbot lequilal ta stojol, te sts'umbale ya me yac'bey yu'unin te lumq'uinale.

¹⁴ Te Cajwaltic ja' me sjoy te mach'a ya yich' ta muq'ue, soc ya me yac'bey sna' stojol te trato yu'une.

¹⁵ Spisil ora ya cac' bael jsit ta stojol Cajwal, melel ja' la yac'on ta libre yu'un te bitic chujc'ule.

¹⁶ Ilawilon, Cajwal, soc na'bon yo'bolil jba, melel jtuquel ayon, soc ayon ta wocol.

¹⁷ Yac ta toyel te jwocol ya caiy, ac'awon ta libre yu'un.

¹⁸ Ilbon awil te jmel-o'tane, soc te jwocole, soc pasbon perdón yu'un te muliletic la jpase.

¹⁹ Ilawil, bayal ta jyalel te jcontrotaque, ay slab yo'tanic cu'un te ya yac' lajele.

²⁰ Canantayawon, coltaybon te jcuxlejale. Ma xawac'on ta q'uexlal, melel ya jle te canantayel awu'une.

²¹ Ac'a quich' canantayel awu'un te bit'il jun co'tan soc te bit'il toj cac'oj jbae, yu'un me cac'oj smuc'ul co'tan ta atojol.

²² Dios cu'un, coltaya te lum Israel yu'un spisil te swocole.