Salmos 24 - Bible in Tzeltal de Oxchuc y TenejapaMuc' Ajwalil ay xojobil yutsilal 1 Te Cajwaltic ja' yu'un ta spamal te balumilale, ta spisil te bitic ay soc ta spisil te bitic cuxajtique. 2 Melel te Cajwaltic, ja' la yac'bey yiptajib te balumilale, la yac' ta sba te maretic soc ta sba ja'etic. 3 ¿Mach'a ya xju' xmo bael ta wits yu'un te Cajwaltique? ¿Mach'a ya xju' ya x'och ta ch'ul templo yu'un? 4 Ja' te mach'a pocbil sc'ab soc yo'tan, te ma'yuc smule; ja' te mach'a ma xch'uun lotil diosetic, soc te ma spas lote. 5 Te Cajwaltic, ja' te Dios te jcoltaywanej yu'une, ja' me ya yac'bey bendición ta stojol, soc ya me xchajban ta stojil. 6 Jich me yilel te mach'atic ya sleic te Cajwaltique, ja' te mach'atic ya sleic te Dios yu'un Jacob. 7 ¡Jama abaic, ti'nailetic te sbajt'el q'uinal ayexe! ¡Jamaluc me ya xjilex, yu'un ya me x'och te Muc' Ajwalil te ay xojobil yutsilale! 8 ¿Mach'a a te Muc' Ajwalil te ay xojobil yutsilal? Ja' te Cajwaltic te tulan, te xujt' ma xiwe. Ja' te Cajwaltic te mero ma xiw ta guerra. 9 ¡Jama abaic, ti'nailetic te sbajt'el q'uinal ayexe! ¡Jamaluc me ya xjilex, yu'un ya me x'och te Muc' Ajwalil te ay xojobil yutsilale! 10 ¿Mach'a a te Muc' Ajwalil te ay xojobil yutsilal? Ja' te Cajwaltic te Spisil ya xju' yu'une. Ja' te Muc' Ajwalil te ay xojobil te yutsilale. |
Biblia en Tzeltal de Oxchuc y Tenejapa © Sociedad Bíblica de México, A.C., 2001.
Bible Society of Mexico