Salmos 22 - Bible in Tzeltal de Oxchuc y Tenejapa

Aw yu'un woclajel soc c'ayoj ta alel yutsilal Dios

¹ Dios cu'un, Dios cu'un, ¿bi yu'un la apijt'eson? ¿Bi yu'un ma xtal acoltayon? ¿Bi yu'un te ma ba ya awaiybon stojol te coq'uele?

² Dios cu'un, c'aal ajc'ubal yacon ta c'op, pero ma'yuc bay ya ajac'bon jc'op. Ma'yuc bay ya jcux co'tan ya caiy.

³ Te ja'ate, Ch'ul Diosat atuquel; ja'at ya xmandalajat, ya yalbat yutsil ac'oplal te Israel.

⁴ Te jme'il-tatiletic la smuc'ulinat yo'tanic; la smuc'ulinat yo'tanic, jich la acoltay.

⁵ La sc'anic coltayel ta atojol, jich la awac' ta libre; la smuc'ulinat yo'tanic, jich ma la awac' ta q'uexlal.

⁶ Te jo'one ma winicucon, jich c'oemon bit'il yalja; te jo'one ya stse'luyon te ants-winiquetique.

⁷ Te mach'atic ya yilon ya slabanonic; ya yixlan yeic soc ya sjimulay sjolic,

⁸ soc jich ya yalic: “Ja' smuc'ulinej yo'tan te Cajwaltique; ja' yu'un ac'a yich' canantayel yu'un. Ac'a scoltay, melel bayal c'ux ta yo'tan”, xiic.

⁹ Ja'uc me to, ja'at la awac' yalatayon te jme'e; la awac'bon jcux co'tan ta xchu' te jme'e.

¹⁰ Te c'alal ma to x'ayinon a, canantaybilonix awu'un a; te c'alal ma to x'ayinon yu'un a te jme'e, Diosatix cu'un a.

¹¹ Ma me c'ubuluc xawac' aba ta jtojol, yu'un nopol meix ta jtojol te woclajele, ma'yuc mach'a ya scoltayon.

¹² Te jcontrotac sjoytayejonic jichuc toroetic, c'ajc'al toroetic yu'un Basán yilel;

¹³ ya x'awunic jichuc c'ajc'al león-chojetic, ya sjach yeic, ya xwiliquix tel ta jtojol.

¹⁴ Jich c'oemon te bit'il ja' te ya xmale; te jbaquel pitc'ujemiquix. Te co'tan jich c'oem te bit'il chabec' te ya x'ulub ta yutil te jbaq'uetale.

¹⁵ Taquinix que jich bit'il te taquin xejt'el oxom; slap'ojix sba cac' ta yutil que. La awac'on coel ta muquel ta yawil te lajele.

¹⁶ Jich bit'il ts'i'etic te jtsojp yac'oj sbaic, jc'axel sjoytayejonic ta jyalel te mach'atic amen yo'tanique; la yejch'entesbonic jc'ab soc cacan.

¹⁷ Ya xju'ix ta ajtayel te jbaquele, melel chajalix. Te jcontrotac ma sq'uejic bael sitic ta jtojol;

¹⁸ te jc'u'-jpaq'ue la spuc sbaic a, la spasbeyic snumeroil ta na'el te mach'a ya xc'ot ta swentae.

¹⁹ Te ja'at Cajwal, ja' quipat atuquel, ma me c'ubuluc xawac' aba, la', coltayawon ta ora.

²⁰ Coltayawon ta lajel ta ye te puñale, ma xawac' smilon te ts'i'etic c'oeme.

²¹ Coltayawon ta ye te león-chojetique; c'opojan cu'un te ma sluchonic ta xulubic te toroetique.

²² Ya me calbat ac'oplal ta stojol te quermanotac; ya me calbat yutsil ac'oplal ta bay te tsoblej yu'unique.

²³ Ja'ex te awich'ojic ta muc' te Cajwaltique, albeyaic yutsil sc'oplal. Muc'uc me yutsil sc'oplal awu'unic ta apisilic te sts'umbalex Jacob. Ich'a ta muc' apisilic te sts'umbalex Israel.

²⁴ Ma ba ya yilay stuquel te me'baetic, ma jichuc nax ya xc'ax bael ta stojolic te bi ora ay swocolique, ma snac' sba ta stojolic te c'alal yacalic ta oq'uele. Ya me yaiy stojol stuquel teme ya sc'anbeyic coltayele.

²⁵ Ya me calbey yutsil ac'oplal te bit'il jun awo'tan, ya me cal ta stojol te lum awu'un c'ax bayal ta ajtayele; ya me xc'ot ta pasel cu'un ta atojol te bitic caloj ta stojol te mach'atic ya yich'at ta muq'ue.

²⁶ We'anic, ja'ex te tenbilex ta uts'inele, ja' to me c'alal ya xnoj ta lec te ach'ujt'ique; albeyaic yutsil sc'oplal Cajwaltic ja'ex te ya aleique, cuxinanic bayal ja'wil.

²⁷ Ja'ex te sts'umbalex spisil ta jchajp ants-winiquetic, ja'ex ta apisilic te ayex ta spamal te balumilale, na'aic me te Cajwaltic. La'ic me, quejana abaic ta stojol.

²⁸ Melel te Cajwaltic ja' muc' ajwalil stuquel, ja' ya xmandalaj ta stojol spisil te nacionetique.

²⁹ Ta apisilic te ay bayal bitic ay awu'unic te cuxulex ae, tinana abaic ta stojol, ja' nax me ya awalbeyic wocol stuquel; ja'ex ta apisilic te sujt'el ayexix bael ta ts'ubil lume, melel ma spisiluc ora cuxulex atuquelic.

³⁰ Te jts'umbal baele ya me squejan sbaic ta stojol te Cajwaltic, soc ya me yalbeyic bael sc'oplal te jayeb c'aal cuxulique.

³¹ Ya me yalbeyic te mach'atic ya x'ayinic bael ta patil te bit'il toj stuquel te Cajwaltic soc te yat'el sc'abe.