Salmos 21 - Bible in Tzeltal de Oxchuc y Tenejapa

C'ayoj yu'un tsalaw

¹ Cajwal, bin nax yo'tan te muc' ajwalil, melel awac'ojbey yip; bin nax yo'tan melel awac'oj ta tsalaw.

² La apasbey te bitic la sc'an yo'tane; ma'yuc la amacbey ta c'op te bitic la sc'anbate.

³ La awic' ta atojol, soc la awac'bey muc' bendición, soc la awac'bey scoronain oro.

⁴ La sc'anbat xcuxlejal, jich la awac'bey; najt'il cuxlejal la awac'bey te ya xjalaje.

⁵ Wocol la awal yu'un te coltayele, mero muc' te yip awu'ele; la awac' ta ich'el ta muc'.

⁶ Awac'ojbey bendición sbajt'el q'uinal; te bit'il ajoinej, jich bin nax yo'tan awu'un.

⁷ Te ja'at muc' ajwalil, ma'yuc bi ora ya xyalat, melel ja' smuc'ul awo'tan te Cajwaltique; ja' smuc'ul awo'tan te xc'uxul yo'tan te mach'a mero Toyole.

⁸ Te awip ya me sta ta tsalel te acontrotaque; ta swa'el ac'ab ya me atsal a te mach'a ay slab yo'tan awu'une;

⁹ ya awac' ochel ta yutil horno te ay sc'aale, te c'alal ya sc'an awo'tan ya awac'bey castigo soc te awilimbae. Ta swenta sc'ajc'al yo'tan te Cajwaltique, ya me yac' tanubuc ta c'ajc' te ya xlajinwane.

¹⁰ Ya atup' ta balumilal soc ta yolil te ants-winiquetique te snich'nabic soc te sts'umbalique.

¹¹ Manchuc me ay bi ya sc'an spasbat soc teme ya xchap te bila ya sc'an ya yutat ta sc'ope, ma xju' yu'un te ya stsalate.

¹² Te ja'ate ja' nax me ya awac' x'anic loq'uel ta atojol; ya me atojlin bael ta t'imuyel ta stojolic.

¹³ Cajwal, jajch'an tel soc awu'el. Ya me jc'ajintaytic te tsalaw awu'une.