Salmos 2 - Bible in Tzeltal de Oxchuc y Tenejapa

Ja'at jnich'anat

¹ ¿Bi yu'un te bayal yacalic ta c'op te lumetic te ma'yuc ta stojol Dios? ¿Bi yu'un te tojol nax bila ya xchapic te ma'yuc swentail?

² Te muc' ajwaliletic soc te yantic ajwaliletic ta balumilal ya stoy sbaic, jun nax ya yac' sbaic ta xchajbanel sc'oplal te Cajwaltic soc te muc' ajwalil te tsabilix yu'une.

³ Ya x'awunic: “Ya jloq'uestic te cadena yu'unic. Ya cac' jbatic ta libre te bit'il chuculotique”, xiic.

⁴ Te Cajwaltic te yac ta mandal ta ch'ulchane ya nax stse'lubey sc'opic.

⁵ Ya me xiwtesbey yo'tanic ta yilimba; ta swenta sc'ajc'al yo'tan jich me ya yal:

⁶ “La caq'uix ta mandalteswanej te muc' ajwalil cu'une, ta bay ch'ul wits Sión cu'un”, xi' me.

⁷ Ya me jpuc ta alel ta bayuc te bila snopoj ta jtojol te Cajwaltique te la yalbonix: “Ja'at jnich'anat; nax to nax la jnich'nantayat.

⁸ C'anbon te ya cac'bat te lumetic swenta yu'un ya me awu'unin, jo'on me ya cac'bat ja' to ta bay slajibal te balumilale.

⁹ Ta swenta te abastón pasbil ta hierro ya me alajinbey yat'elic a te lumetique; ts'ubiltic me ya xjilic ta wuyel awu'un jichuc pac'bil oxom”, xi' me te Diose.

¹⁰ Ja'ex muc' ajwaliletic soc yantic ajwaliletic ta q'uinal, ac'a c'otuc ta awo'tanic, nopaic ta lec te bila ya cac'beyex anopique.

^11-12 Binuc nax me awo'tan ya aquejan abaic ta stojol Cajwaltic soc ich'aic ta muc'; nijc'uc me awo'tanic, tinana abaic ta stojol, ma me xawac' x'ilin ta atojolic, teme repente ya xlajex jilel ta be yu'un, melel ma me wocoluc ya xtil jichuc c'ajc' te yilimbae. ¡Bin nax me yutsil te mach'a ya sle canantayel yu'un te Cajwaltique!