Salmos 19 - Bible in Tzeltal de Oxchuc y Tenejapa

Yutsilal yat'el Dios

¹ Te ch'ulchan, ja' ya spucbey sc'oplal yutsilal te Diose; te sjamalul ch'ulchan, ja' ya yalbey sc'oplal yat'el sc'ab.

² Te jujun c'aal ya sc'opon sbaic c'oem; te jujun ajc'ubal ya yalbey sbaic p'ijil c'op.

³ Manchuc me ma'yuc c'op ta alel yu'unic, ni ayuc jp'aluc ta aiyel;

⁴ ja'uc me to, ay ta puquel ta spamal balumilal te sc'opic c'oeme, ja' to ta bay c'alal sti'il balumilal, ja' to c'alal ta bay ya xch'ay bael te c'aale.

⁵ Te c'aale, bin nax yo'tan ya xjajch' st'un bael sbe, jich bit'il mach'a yac ta nujbinel te ya xloc' tel ta sna, soc jich bit'il mach'a c'aem ta animale.

⁶ Te c'aal ya xloc' tel ta jejch' ch'ulchan, ya xjoybej bael ja' to c'alal ya xc'ot ta loq'uel ta yan jejch' ch'ulchan, ma'yuc mach'a ya xju' snac' sba yu'un te xq'uixnale.

⁷ Mero lec te p'ijubtesel yu'un te Cajwaltique, melel ya x'ach'ub jcuxlejaltic yu'un. Te smandal Cajwaltic jun nax bi ya yal, melel ya xpasot ta p'ij yu'un te mach'a ma sna' q'uinale.

⁸ Te mandaliletic yu'un Cajwaltic toj ay stuquelic, melel ya yac'botic yutsil co'tantic. Te smandal Cajwaltic ma'yuc bila capal soc, ya xchicnaj yutsilal ta jsit-quelawtic.

⁹ Ay yutsil te mach'a yich'oj ta muc' te Cajwaltique, ya me xjalaj sbajt'el q'uinal stuquel. Te bitic chapal yu'un Cajwaltic mero smelelil stuquel, ta spisilic toj ay te bitic chapal yu'une,

¹⁰ cajal me sc'oplal ta co'tantic, c'ax jich te bit'il t'ujbil oro, jich me cajal sc'oplal ta co'tantic te bit'il sbujts' te chabe.

¹¹ Ja' me ya yac'bon jtsajtay co'tan te yabaton te Cajwaltique, teme ya jch'uune, jich me lec ya xc'oon ta loq'uel a.

¹² ¿Ay bal mach'a ya sna' te bitic falta yu'une? Te faltaetic cu'un te jnac'oje, pasbon perdón, Cajwal.

¹³ Loq'uesbon toybail ta co'tan jo'on te awabatone; ma xawac' swentainon te toybaile. Jich ma'yuc jmul; jich me ma stsalon te muc' mulile.

¹⁴ Cajwal, lecuc me ya awilon yu'un te jc'op soc te bitic ay ta co'tane, ja'at jcanantaywanejat soc jcoltaywanejat cu'un.