Salmos 17 - Bible in Tzeltal de Oxchuc y Tenejapa

Sc'anel chajbanel ta stojol Dios

¹ Cajwal, aiybon awaiy stojol te jc'ope, yu'un toj te bila ya jc'anbate. Aiybon awaiy stojol te coq'uele, melel ma ba xloc' ta que lotetic.

² Ja'at me te ya achajbanon, melel ya ana' ta bay toj ta melel.

³ Te ja'at ana'oj ta lec te bitic ya jnop ta co'tane; ta ajc'ubal ya xtal awilon spisil ora; melel apasojonix ta prueba ta c'ajc', ma'yuc ataojbon te bila amen ta jtojole. Ma'yuc caloj te bitic ma lecuc ta alel

⁴ jich bit'il ya spasic te yantique. Jilem cu'un sbelal te c'ajc'ubele, jich bit'il ya yal te mandaliletic awu'une.

⁵ Jun co'tan jt'unojbat ya caiy te abe; ma'yuc bay quijq'uitayejbat ta ch'uunel te amandale.

⁶ Dios cu'un, ya me jtoy jc'op ta atojol, melel ya atsacbon jc'op atuquel; aiya awaiy stojol ta achiquin, aiybon awaiy stojol te jc'ope.

⁷ Ac'bon quil ta lec te xc'uxul awo'tane, ja'at te ya acoltay te mach'atic ay scontroique, te ya sleic canantayel yu'un te awu'ele.

⁸ Jich me x'acanantayon te bit'il xch'ulel asit; canantayawon ta yet'al axic' c'oem,

⁹ ma me xawac'on ta sc'ab te mach'atic amen yo'tanique, ja' jcontrotac te sjoytayejonic, te ya sc'an yo'tanic te ya yac'on ta lajele.

¹⁰ Toybailetic, cajal nax yac'oj sbaic soc te sc'opique;

¹¹ nopol ya staonix, q'uelel sitic te yacuc sjiponic ta lum.

¹² León-chojetic yilel, c'ajc'al león-chojetic, chapalic ta bay snac'oj sbaic, yo'tanuc te ya stsacawanic ta ora.

¹³ Cajwal, jajch'an, nujp'usitaya aba soc. Ac'beya squejan sbaic ta atojol. Te mach'a amen ta jtojole ja' me ya acoltayon a te apuñale.

¹⁴ Cajwal, ta swenta awu'el ac'awon ta libre ta stojolic; loq'uesa ta jc'axel ta balumilal, melel ja' nax yu'unic stuquel te cuxulic ta q'uinale. Ac'a yich'ic bayal castigo, soc ac'a c'otuc ta stojol snich'nabic ja' to c'alal ma xcujch' yu'unic, soc ac'a c'otuc ta swenta te smamatac te sobraile.

¹⁵ Yan te jo'one jamal ya cal ta melel: tic' a te bit'il ya quilbey jba jsitic, te ya quilat te c'alal ya xwijc' te jsite.