Salmos 16 - Bible in Tzeltal de Oxchuc y Tenejapa

Ma'yuc yan bi lec ay ta u'uninel

¹ Dios cu'un, canantayawon, melel yacon ta sleel te jcanantayel awu'une.

² Te jo'one calojbatix: “Te ja'at Cajwalat, te ay jlequilal awu'une; ma'yuc mach'a ya spajat te ja'ate”, xoon.

³ Te yajcananic te ay ta jlumale, bayal yu'el ta sc'opic, jich ya yalic te mach'atic bin nax yo'tanic yu'un.

⁴ Ya me x'esmaj swocolic te mach'atic ya xbajt'ic ta stojol yantic diosetic; yacalic ta yalbeyel bayal wocol. Mero ma xcac' jba ta smalel xch'ich'el te milbil majt'anil yu'unique. Ma me xcal loq'uel ta que te sbiilique.

⁵ Cajwal, ja' nax ayat ta co'tan. Ja'at ya awac'bon bayal ta jchajp bendición ta jtojol; te jcuxlejal ay ta ac'ab.

⁶ T'ujbil awilal ay ta jwenta awu'un; t'ujbil bi la awac'ojbon cu'unin.

⁷ Ya calbey yutsilal te Cajwale, melel j'ic'wanej cu'un; ta mero yutil co'tan ya sp'ijubteson jujun ajc'ubal.

⁸ Spisil ora ay ta jtojol te Cajwale; ta swenta te bit'il ayon ta swa'el sc'ab, ma'yuc bila ya xju' syaleson.

⁹ Jich yu'un, nojel sbujts' co'tan. Ta spisil jcuxlejal ma'yuc jwocol ya caiy,

¹⁰ melel ma ba ya awijq'uitayon jilel ta muquenal, ma ba ya apijt'es jilel ta ch'en te mach'a jun yo'tan ta atojole.

¹¹ Ya awac'bon quil sbelal te cuxlejale. Ay mero muc' yutsil q'uinal ya caiy, ay yutsil sbajt'el q'uinal ta atojol.