Salmos 149 - Bible in Tzeltal de Oxchuc y Tenejapa

Jpaswanej te Diose soc ja' Muc' Ajwalil

¹ ¡Bin nax yutsil te Cajwaltique! C'ajintayaic ta yach'il c'ayoj te Cajwaltique; albeyaic yutsilal ta bay stsoboj sbaic te mach'atic jun yo'tanique.

² Bayaluc me sbujts' q'uinal x'awaiyic, israeletic, ja'ex lum Sión, melel ja' jpaswanej awu'unic te Diose, soc ja' Muc' Ajwalil awu'unic.

³ Albeyaic yutsilal sbiil ta swenta ajc'ot, c'ajintayaic c'ayojetic soc arpaetic soc panderoetic.

⁴ Melel te Cajwaltic ya smulan te lum yu'un; te mach'atic peq'uelic ya x'ac'otic ta ich'el ta muc' ta swenta tsalaw.

⁵ Bayaluc me yutsil q'uinal ya yaiyic yu'un te tsalaw, ja' te mach'atic jun yo'tanic ta stojol; manchuc teme wayalex c'ajinanic ta swenta sbujts' q'uinal.

⁶ Albeyaic yutsilal Dios ta aweic; soc ayuc me ta ac'abic puñal te xcha'jejch'el ay ye,

⁷ swenta spacol ta stojolic te mach'atic ma ba xch'uunejic Dios, swenta yac'beyel castigo nacionetic,

⁸ swenta xchuquel ta cadena muc' ajwaliletic soc yantic te mach'atic ay yipic, ya me yich'ic chuquel ta taq'uin te buen alic,

⁹ swenta yu'un jich ya xc'ot ta pasel a te castigo ts'ibubil ya xc'ot ta stojolique. Ja' me yich'elic ta muc' yu'un ta spisilic te mach'atic jun yo'tanic ta stojol Dios. ¡Bin nax yutsil te Cajwaltique!