Salmos 148 - Bible in Tzeltal de Oxchuc y Tenejapa

Ya yalbeyic yutsilal Cajwaltic te bitic spasoj

¹ ¡Bin nax yutsil te Cajwaltique! Albeyaic yutsilal Cajwaltic c'alal ta ch'ulchan. Albeyaic yutsilal c'alal ta toyol.

² Albeyaic yutsilal, ja'ex ta apisilic te ch'ul abatex yu'une. Albeyaic yutsilal, ja'ex soldado ch'ul abatex te ayex ta ch'ulchane.

³ Albeyaic yutsilal, ja'ex c'aal soc u. Albeyaic yutsilal, ja'ex eq'uetic te bayal axojobilique.

⁴ Albeya yutsilal, ja'at ch'ulchan te ayat ta sba te ch'ulchane, soc ja'at ja'etic te ayat ta sba te ch'ulchane.

⁵ Albeyaic yutsilal sbiil te Cajwaltique, melel ja' stuquel la yal mandal, jich pastaj spisil te bitic ayique;

⁶ ja' la yac' ta yawil swenta sbajt'el q'uinal, soc la xchajban mandalil yu'un te ma xju' ta c'axintayele.

⁷ Albeyaic yutsilal te Cajwaltique li' ta balumilal muc'ul chambalametic ta mar, soc mero sc'ubulil mar,

⁸ te chawuc soc te bat, te toib soc te tocale, te chawuquil ic'al ja'al te ya xch'uunbey te mandaletic yu'une.

⁹ Albeyaic yutsilal te witsetic soc te tseletique, ta spisilic te cedroetic soc te te'etic ya yac'botic site,

¹⁰ te chambalametic ayic ta na, soc te ja'mal chambalametique, te mutetic ya xwilic, soc te chambalametic staslajanic ta lum.

¹¹ Albeyaic yutsilal te muc' ajwaliletic ta balumilal soc ta spisil ta jpam lumetic, ta spisil te jmandalteswanejetic soc jwentainwanejetic ta balumilal,

¹² winiquetic soc antsetic, spisil muc'-biq'uitetic.

¹³ Ta apisilic albeyaic yutsilal sbiil te Cajwaltique, melel ja' nax stuquel te mero toyole. C'ax toyol te yutsil bit'il te ch'ulchan soc te balumilal.

¹⁴ Ja' yac'ojbey yip te lum yu'une. Albeyaic yutsilal ta apisilic te jun awo'tanic ta stojol, ta spisil te israeletic, te ja' lum yu'un te nopol ay ta sts'eele. ¡Bin nax yutsil te Cajwaltique!