Salmos 146 - Bible in Tzeltal de Oxchuc y Tenejapa

Albeyel yutsilal yat'el te Diose

¹ ¡Bin nax yutsil te Cajwaltique! Ya me calbey yutsilal sc'oplal Cajwal ta spisil co'tan.

² Ya me calbey yutsilal sc'oplal Cajwal te bit'il cuxulon to; te Dios cu'un ya me jc'ajintaybey c'ayojetic te bit'il ayon to ta q'uinale.

³ Ma me xawac' smuc'ulin awo'tanic te winiquetic te muc' sc'oplalic, tojol winiquetic nax, ma me yu'unuc ay colel ta swentaic.

⁴ Melel teme lajique, ya sujt'ic ta ts'ubil lum; jich ora ya xch'ay bael te bitic snopojique.

⁵ Bin nax me yutsil te mach'a ya yich' coltayel yu'un te Dios yu'un Jacob, ja' te ay ta yo'tan smaliyel te Cajwaltic te Dios yu'une.

⁶ Ja' la spas ch'ulchan, balumilal, soc mar, soc spisil te bitic aye. Melel te bila ya yal, ya xc'ot ta pasel.

⁷ Ya xchajban te mach'atic ay ta uts'inel; ya yac'bey swe'elic te mach'atic ay ta wi'nale. Te Cajwaltic ya yac' ta libre te mach'atic chuculic;

⁸ te Cajwaltic ya sjambey sit te mach'atic ma xyilic q'uinal; te Cajwaltic ya stijbey xan jajch'el yo'tanic te mach'atic peq'ueliquixe; te Cajwaltic c'ux ta yo'tan te mach'atic toj yac'oj sbaic;

⁹ te Cajwaltic ya scanantay te jyanlumetic, swentainej stuquel te me'ba alaletic soc te me'ba antsetique; yan te mach'atic amen yo'tanic ya me yac' xjowej ta beel stuquelic.

¹⁰ Ja'at lum Sión, te Cajwaltic ja' me muc' ajwalil sbajt'el q'uinal; te Dios awu'un ya me xmandalaj ta stojol cajalcaj bael te alnich'anetic awu'une. ¡Bin nax yutsil te Cajwaltique!