Salmos 145 - Bible in Tzeltal de Oxchuc y Tenejapa

Ants-winiquetic ac'a yalbeyic yutsil Cajwaltic

¹ Dios cu'un, ya jtoyesbat sc'oplal te amuc'ule; Muc' Ajwalil cu'un, spisil ora ya calbey yutsil te ach'ul-biile.

² Jujun c'aal ya calbat yutsil ac'oplal; spisil me ora ya calbey yutsil te abiile.

³ Mero muc' te Cajwaltic, ya sc'an ya calbeytic yutsil sc'oplal; ma xju' cu'untic sna'el te smuc'ule.

⁴ Te tatiletic soc te cajalcaj snich'nabic ya me yalulayic bael yutsil sc'oplal te awat'el; ya me spucbeyic sc'oplal te yip awu'ele.

⁵ Ya me yich' alel smuc'ul yutsil abiil; ya me calulay jchajp yutsil te awat'ele.

⁶ Ya me yich' alel te ay yip awu'el ta at'el te xiweltic sba; te jo'on ya me calbat te amuc'ule.

⁷ Ya me yich' alel te ma p'isbiluc yutsil awo'tan; ya me yich' alel ta aw te toj awo'tane.

⁸ Te Cajwaltic t'ujbil yutsil yo'tan, ya sna' yo'bolil jbatic; ay xc'uxul yo'tan stuquel, ma x'ilin ta ora.

⁹ Te Cajwaltic mero lec yo'tan ta jtojoltic ta jpisiltic, buen t'ujbil yo'tan ta scanantayel te yat'ele.

¹⁰ Cajwal, ac'a me yalbat yutsil ac'oplal spisil te bitic la apase; ac'a yalbat yutsil ac'oplal te mach'atic jun yo'tanic ta atojole.

¹¹ Ac'a me yalic te yutsil awat'el ta ajwalil; ac'a me yalic te yip awu'ele.

¹² Ac'a yich' ac'beyel sna' spisil ants-winiquetic te awu'ele, soc te smuc'ul yutsil awat'el ta ajwalil.

¹³ Te awat'el ta ajwalil sbajt'el q'uinal ay; te wentainel awu'un sbajt'el q'uinal stuquel.

¹⁴ Te Cajwaltic ya stsac ta sc'ab te mach'atic ya xyalic; ya yac'bey xan yip te mach'atic yacalic ta lajel yipique.

¹⁵ Spisilic ya yac' sitic ta smaliybelat te bi ora ya awac'bey te swe'elique.

¹⁶ Soc yutsil awo'tan ya awac' ac'ab, ya awac' ya xnoj xch'ujt'ic te bitic cuxulic ta q'uinale.

¹⁷ Te Cajwaltic stalel toj yo'tan stuquel, yat'elinej c'uxtaywanej.

¹⁸ Te mach'atic ya sc'opon te Cajwaltique, nopol ay ta stojolic, ja' te mach'atic soc yo'tanic ta smelelil te ya sc'oponique.

¹⁹ Te mach'atic ya yich'ic ta muc' te Cajwaltic, ya me x'ac'botic yu'un te bila ya sc'anique; c'alal ya sc'anbeyic coltayel, ya me x'aiybot sc'opic, ya me yich'ic coltayel.

²⁰ Te mach'atic c'ux ta yo'tanic te Cajwaltique, ya xcanantayot ta lec; yan te mach'atic amen yo'tanic ya sjinbey xcuxlejal stuquelic.

²¹ Ya me cal ta que te yutsil sc'oplal te Cajwale. Spisilic me ac'a yalbeyic sc'oplal xch'ul yutsil yo'tan ta ora to soc ta sbajt'el q'uinal.