Salmos 144 - Bible in Tzeltal de Oxchuc y Tenejapa

Te muc' ajwalil la yal wocol ta stojol Dios

¹ Bayaluc me yutsil te Cajwaltic, ja' te jcanantaywanej cu'une. Ja' stuquel te ya sp'ijubteson soc te ya xchajbanon yu'un ya x'ochon ta guerra.

² Jun yo'tan cu'un, ja' cawil te banti ya quich' canantayel, ja' te mero toyol anjibal soc te j'ac'aw ta libre cu'une. Ja' jmajq'uil stuquel te ya jcanantay jba a; ja' stuquel te ya yac'bon ta jc'ab te lumetique.

³ Cajwal, ¿bi swentailuc awu'un te ants-winiquetic te ma xch'ay ta awo'tane? ¿Bi swentailuc awu'un te yal-snich'nab te bayal sc'oplal ta awo'tane?

⁴ Te xcuxlejal te ants-winiquetic jich bit'il ya jic' co'tantic; te xcuxlejalic jich nax ya xc'ax te bit'il axinal.

⁵ Cajwal, jama te ch'ulchan, coan tel; tija te witstiquil swenta yu'un ya me xloc' xch'ailel.

⁶ T'ima bael yat'ejibal te at'imalte', ja' te tsantsewaletic; te acontrotac ac'a spuc sbaic bael ta anel.

⁷ Xach'a tel ac'ab c'alal ta toyol, ac'awon ta libre, ma me xyu'uninon te muc'ul mar c'oeme; ac'awon ta libre, ma me xyu'uninon te jyanlumetique.

⁸ Ja'ic te mach'atic ya yalic lot; ja'ic te ya sjach swa'el sc'abic ta yalel ta lot te jc'axel mero melel ta sc'opic te bila ma meleluque.

⁹ Cajwal, ya jc'ajintaybat awaiy yach'il c'ayoj; ya jc'ajintaybat awaiy c'ayoj soc muc'ul arpa.

¹⁰ Ja'at te ya awac' ta tsalaw muc' ajwaliletic; ja'at te la awac' ta libre te awabat David, ya acoltayon ta milel ta puñal.

¹¹ Ac'awon ta libre, ma me xyu'uninon te jyanlumetic. Ja'ic te mach'atic ya yalic lot, ja'ic te ya stoy swa'el sc'abic ta yalel ta lot te jc'axel mero melel ta sc'opic te bila ma meleluque.

¹² Te jquerem-nich'nabtic jichic ya xmuc'ubic te bit'il ya xmuc'ub te ts'unbil nichimetic te banti pasbil slumile; te cantsil-nich'nabtic jichic te bit'il walubil ton oyetic te scuchojbey yalal te templo.

¹³ Te snail jwe'eltic nojelic ta jyalel yu'un spisil ta jchajp we'eliletic. Te chijetic cu'untic ta jmil yacal ta esmajel bael; bayal ta jmil ayic ta aquiltic cu'untic.

¹⁴ Te wacaxetic cu'untic ay yal ya xjilic; ma'yuc bay jich nax ya xc'ax yalic te ma to sta yuile. Ma'yuc mach'a ya x'awun yu'un xiwel ta guerra ta calleetic cu'untic.

¹⁵ Bin nax me yutsil te lum te jich ay yu'un spisile; bin nax me yutsil te lum te ja' Dios yu'un te Cajwaltique.