Salmos 142 - Bible in Tzeltal de Oxchuc y Tenejapa

Ja' anjibalat cu'un

¹ Tulan yacon ta yawtayel te Cajwaltique; tulan te jc'op yacon ta sc'anel te jc'uxtayele.

² Ya me cal ta stojol te bila yacon ta parte yu'une; ya me cac' ta na'el stojol te jwocol,

³ te bi ora jc'axel yaquix ta comel q'uinal ya caiye. Cajwal, awiloj te be jt'unoje: ja' ta bay ya xbeenon, la yac'bonic jpejts'ul ta be.

⁴ Ya jsujt'es bael jsit ta swa'el jc'ab, ma'yuc mach'a ya quil te ya xtal scoltayone. Ma'yuc mach'a ya xc'opoj cu'un; ma'yuc mach'a ya xtal ta yo'tan te ya scanantayone.

⁵ Cajwal, ja'at me ya cawtayat, jich ya calbat: “Ja'at me anjibalat cu'un; ja'at xanix atuquel te cuxulon awu'un ta ora to”, xoon me ta atojol.

⁶ Aiybon awaiy te caw, melel ma'yuquix te quipe. Ac'awon ta libre yu'un te mach'atic ya yuts'inonic, melel c'ax tulanic a te bit'ilone.

⁷ Loq'uesawon ta chuquel swenta yu'un ya calbat yutsil ac'oplal. Te mach'atic lec yo'tanic ya me sjoytayonic te c'alal ya ac'uxtayone.