Salmos 141 - Bible in Tzeltal de Oxchuc y Tenejapa

Cajwal, cac'oj jsit ta atojol

¹ Cajwal, ja'at ya jc'oponat: La' me ta ora ta jtojol; aiybon jc'op, Cajwal, yacon ta yalel wocol ta atojol.

² Cajwal, lecuc me ta atojol te jc'ope, smesetuc sbujts' yic' jichuc pom ya xc'ot ta atojol; te jc'ab jtoyoj ta atojol, jichuc c'oem te bit'il milbil amajt'an, ja' te amajt'an swenta smalel c'aale.

³ Cajwal, ac'bon ta canantayel que, swenta yu'un ya me xcomon ta c'op, ya me xcomon te manchuc ya jam que.

⁴ Ma me xtal ta co'tan te bitic ma lecuc ta pasel; ma me xawac' xnoptsajon a te bitic amen ta pasele, ma me xawac' te ya join ta we'el swenta sq'uinic te mach'atic amen yat'elique.

⁵ Te castigo ya yac'bon te mach'a toj yo'tan, swenta me jc'uxtayel ya xc'ot te tojtesel ta jtojole, pajal soc t'ujbil perfume. Ma'yuc bi ora ya jc'an ich'el ta muc' yu'unic, pero ya me cac' puersa ta sc'oponel te Diose.

⁶ Te jwentainwanejetic yu'un te mach'atic amen yo'tanique ya me yich'ic ch'ojel coel ta wits; ya me yilic te lume te melel te jc'op ya cale.

⁷ Ya me yich' puquel sbaquelic ta ti'il smuquenal; pujul me ya xjil jichuc joc'bil lum.

⁸ Cajwal, cac'oj jsit ta atojol. Yacon ta sleel canantayel awu'un; ma me xapijt'eson, Cajwal.

⁹ Spasojboniquix jpejts'ul, pero ma me xawac' xyalon a, coltayawon me atuquel; ma me xawac' yalucon ta syac te mach'atic amen yat'elique.

¹⁰ Te mach'atic amen yo'tanic te ya spasbonic jpejts'ul, ja' nix me ac'a ochuc tey a; te jo'on toj me ya xc'axon.