Salmos 140 - Bible in Tzeltal de Oxchuc y Tenejapa

Sc'oponel Dios swenta sc'anel canantayel

¹ Cajwal, ac'awon ta libre, ma me x'ochon ta sc'ab te mach'atic amen yo'tanique; canantayawon, ma me x'ochon ta sc'ab te j'uts'inwanejetique,

² ja' te mach'atic ya snop te bi ya yut ya yac'bon jwocol, soc ja' te mach'atic spisil ora ya sjachic majtomba.

³ Te yaq'uic mero jayic, pajal soc yac' jti'awal chan; te sc'opic pajal soc svenenoil ye ajachan.

⁴ Cajwal, canantayawon, ma me xyu'uninon te mach'atic amen yo'tanetique; canantayawon, ma me x'ochon ta sc'ab te j'uts'inwanejetique, ja' te mach'atic ya xchap sc'opic swenta yu'un ya x'ochon ta sc'abique.

⁵ Ja'ic te jtoyba-o'tanetic te la spasboniquix jpejts'ul; la slimboniquix banti ya syalesonic; la xchajbaniquix lazoetic; la spasboniquix jpejts'ul ta be.

⁶ Calojbey te Cajwaltic: “Ja'at Diosat cu'un; aiybon caw te yacon ta yalel wocol ta atojole.

⁷ Cajwal, Cajwal, jcoltaywanejat cu'un te bayal awu'el, ja'at me ya acanantaybon jol te c'alal yacon ta guerra”, xoon.

⁸ Cajwal, ma me xawac'bey te mach'atic amen yo'tanic te bitic ya smulan yo'tan; ma me xawac'bey te ya spas xan te bitic snopoj ya spas.

⁹ Te mach'atic sjoytayejonic ya stoy sbaic; ja' nix ac'a c'otuc ta sbaic te ixta c'op te yacalic ta yalele.

¹⁰ Ac'a yaluc coel tel ta sbaic ac'aletic te ayic sc'aale; ac'a yich' aq'uel ochel ta pozoetic te banti ma'yuc bi ora ya xloq'uixe.

¹¹ Ma me xjalajic ta lumq'uinal te mach'atic ma xq'uexawic; spisiluc ora ac'a c'otuc bila amen ta stojolic te j'uts'inwanejetique.

¹² Jna'oj stojil te bila ya spasbey ta stojol me'ba te Cajwaltic, soc ya scoltay te mach'a c'ux obol sbae.

¹³ Te mach'atic toj yo'tanic ya me yalbat yutsilal ac'oplal; te mach'atic toj ayic, ya me x'ainic ta atojol.