Salmos 14 - Bible in Tzeltal de Oxchuc y Tenejapa

Spisil ants-winiquetic jowejemic

¹ Te mach'atic ma sna'ic q'uinal, ya yal ta yo'tanic: “Ma'yuc Dios”, xiic. Spisil jowejemic, mero c'ax amen te bitic spasojique. Ma'yuc jtuluc mach'a ya spas te bila leque.

² Te Cajwaltic c'alal to ta ch'ulchan ya yil te ants-winiquetique; ja' yac ta yilel te ayuc mach'a ya xc'ot ta yo'tan, te ayuc mach'a ya sle te Diose.

³ Ja'uc me to, spisil jowejemic ta be; spisilic pajal boloben yo'tanic. Ma'yuc mach'a ya spas te bila leque. Ma'yuc ni jtuluc.

⁴ Ma'yuc bi ya sna'ic te mach'atic amen yat'elique. Ja'ic ya swe'bonic c'oem te lum cu'une, jich ya slajinic te bit'il mach'a ya swe' waj. Ja' te mach'atic ma sc'anbeyic coltayel ta stojol te Cajwaltique.

⁵ Ya xnijq'uic yu'un te nojel xiwel ta yo'tanique, melel ja' nax sjoinejic Dios te mach'atic xch'uunejbey te smandale.

⁶ Ya slabanic te bi ya sc'an yo'tan te mach'a peq'uelique; ja'uc me to, te Cajwaltic ya me scanantay.

⁷ Ayuc laj bit'il ya xtal ta wits Sión te scolel te lum Israele. Te Cajwaltic ya me yac'bey xan yutsilal te lum yu'une. Jich me bin nax yo'tanic a te sts'umbal Jacob, ja' ta spisil te lum Israel.