Salmos 139 - Bible in Tzeltal de Oxchuc y Tenejapa

Sna'oj spisil te Diose

¹ Cajwal, awilojbon co'tan ta lec, soc ana'ojbon jba;

² ja'at ana'oj spisil te bitic ya jpase; manchuc me c'ubul ayon, pero ana'ojix a te bi ya yal te co'tane.

³ Awiloj spisil te banti ya xbeenon; ana'oj spisil te bitic ya jpase.

⁴ Te c'alal ma to xloc' ta que a te c'ope, ana'ojix a, Cajwal.

⁵ Ayat ta jsit soc ayat ta jpat, ta bayuc ajoytayejon; ma wocoluc ya atsacon ta ac'ab.

⁶ Jchajp nax ya caiy a te ap'ijile, ma xju' cu'un sna'el; mero toyol, ma xju' cu'un stael ta na'el.

⁷ ¿Banti ya xju' ya xboon ta anel ta atojol teme ya xc'ubon baele? ¿Banti wan ya xboon ta anel te ma ba ya xju' ya awilonixe?

⁸ Te yacuc xju' ya xmoon bael ta stoyolil ch'ulchan, tey ayat a; te yacuc xju' ya xcoon bael ta sc'ubulil lumq'uinal, ja' nix jich tey ayat a.

⁹ Te yacuc xju' ya xjajch'on ta wilel, ya xboon ta banti ya xloc' tel c'aal, o teme ya xboon ta nainel ta slajibal mar ta stojol banti ya xmal c'aal,

¹⁰ tey to me ya staon a te ac'abe, soc te swa'el ac'abe ma ba ya yijq'uitayon te jichuque.

¹¹ Te yacuc jnop ta co'tan te ya jnac' jba ta yijc'al q'uinal, o yacuc xc'atp'uj ta ajc'ubal te saquil q'uinal sjoytayejone,

¹² te yijc'al q'uinal, ma xju' ya snac'on ta asit, melel te ajc'ubale, buen sac q'uinal ya awil, pajal nix soc saquil q'uinal ta atojol. Te yijc'al q'uinal soc te saquil q'uinal, pajal nix ta atojol atuquel.

¹³ Ja'at la apasbon spisil jbaq'uetal; ja'at la achajbanon ta xch'ujt' te jme'e.

¹⁴ Ya calbat yutsil ac'oplal melel jchajp nax ya caiy yu'un te bitic apasoje. Tey mero la jna'ix ta lec a.

¹⁵ Ma ba mucul ta asit te bit'il muc'ub jbaq'uetal, ta yorail te muquen la quich' pasel, ta yorail nix te la quich' pasel ta mero sc'ubulil ye'tal lum c'oeme.

¹⁶ Te jbaq'uetal, la yil asit te la yich' pasele; ta spisil ts'ibubilix ta alibro. Awac'ojbeyix señail a te jayeb c'aal ya xcuxinon, te c'alal ma to ayuc ni junuc c'aal cayinel ta balumilal a.

¹⁷ Dios cu'un, mero c'ax bayal yutsil ta co'tan te bila anopoj ta awo'tan te ja'ate; ma ajtaybaj ya xc'ot ta spisil.

¹⁸ Te yacuc cajtay, c'ax jich ya xloc' a te bit'il ji'; teme ju' cu'un yajtayele, joinejat to me abi.

¹⁹ Dios cu'un, lajinbeya xcuxlejal te mach'atic amen yo'tanique, q'uejbon bael ta jtojol te jmilawaletique,

²⁰ ja' te mach'atic amen ac'oplal yu'unic soc te ya stojol-chap sbaic yu'un ya scontroinate.

²¹ Cajwal, te mach'atic xut'et slab yo'tanic ta atojol soc te mach'atic ya yilayate, ¿ma bal xut'etuc slab co'tan ta stojol, soc ma bal yacuc quilay jiche?

²² Ay me slab co'tan ta stojolic ta spisil co'tan; jo'on me jcontrotac ya caiy.

²³ Dios cu'un, na'bon co'tan ta lec, tsajtayawon; pasawon ta prueba, na'bon ta lec bila snopoj te co'tane;

²⁴ ila awil teme yacon ta beel ta sbelal te bila amen; tojtesawon ta be swenta sbajt'el q'uinal.