Salmos 138 - Bible in Tzeltal de Oxchuc y Tenejapa

Swenta yalel wocol Cajwaltic

¹ Cajwal, ta mero spisil co'tan ya calbat awutsilal; ya me jc'ajintaybat c'ayojetic ta atojol, ya me yilic te mach'a cuybilic ta Diose.

² Ya me jquejan jba, ya me cac' bael jsit ta stojol te ch'ul templo awu'un, swenta yu'un ya calbat wocol yu'un te xc'uxul awo'tan soc te bila melel awaloje. Melel ta spisil te bitic ay, ja'at nix toyol ayat yu'unic, soc te ac'op, ja' nix toyol yu'unic.

³ Te c'alal la jc'oponat, la ajac'bon jc'op; soc la awac'bon esmajuc xan quip.

⁴ Spisil te muc' ajwaliletic ta balumilal ya yalbat yutsil ac'oplal te c'alal ya yaiyic te bitic awaloje.

⁵ Ya me sc'ajintayic yutsil sc'oplal Cajwaltic yu'un te bila xchapoj ta yo'tan, melel mero toyol yutsilal stuquel te Cajwaltique.

⁶ Manchuc me mero toyol te banti ay te Cajwaltique, pero ya yil te mach'a peq'uel yac'oj sba, soc ya sna'bey sba ta c'ubul te mach'a jtoyba-o'tane.

⁷ Te c'alal juju-jteb xanix ma ba ya xlajon a, ja'at ya awac' cuxinucon; ya alich' bael te awu'el, ya acoltayon, jich ma xc'ot ta jtojol te yilimba te jcontrotaque.

⁸ Te Cajwaltic bayal me yutsil ya yac' c'otuc ta pasel ta jtojol te yat'ele. Cajwal, sbajt'el q'uinal ay te xc'uxul awo'tan; ts'acal me xapas te bila jajch'em ta pasel awu'une.