Salmos 135 - Bible in Tzeltal de Oxchuc y Tenejapa

Bitic muq'uic spasoj Dios

¹ ¡Bin nax yutsil te Cajwaltique! Albeyaic yutsilal sbiil te Cajwaltique; albeyaic yutsil sc'oplal, ja'ex te abatex

² te ayex ta templo yu'un, te ayex ta yutil yamac'ul templo yu'un te Dios cu'untique.

³ Albeyaic yutsilal te Cajwaltique, melel buen lec yo'tan stuquel; c'ajintayaic sbiil Cajwaltic ta c'ayojetic, melel ya sna' yo'bolil jbatic stuquel.

⁴ Melel la stsa Jacob, ja' te Israel, swenta yu'un ja' sc'ulejal c'ot stuquel.

⁵ Jo'on mero jna'oj ta lec te ja' muc' yu'un spisil bitic cuybil ta Dios te Cajwaltic Diose.

⁶ Te Cajwaltic ya spas spisil te bitic ya smulan spasel, ja' nix jich ta ch'ulchan, soc ja' nix jich ta balumilal, jich nix ta mar, soc ja' nix jich ta sc'ubulil mar.

⁷ Ya sjach tel te tocaletic c'alal ta sti'il balumilal; ya spas te tsantsewaletic te ya yac' ta na'el te ya xtal ja'al; soc c'alal ta stsobjibal ya sloq'ues tel te iq'ue.

⁸ Ja' stuquel te la yejch'entes swenta lajel te ba alaletic yu'un spisilic te egipcioetic, soc te sba yal te chambalametic yu'unique.

⁹ Ta mero yolil Egipto la spas jchajp señailetic ta swenta scontroinel faraón soc te abatetic yu'une.

¹⁰ Bayal nacionetic la yejch'entes ta lajel; la slajinbey xcuxlejalic bayal muc' ajwaliletic te bayal yipic:

¹¹ ja' te Sehón, muc' ajwalil yu'un amorreoetic, ja' te Og, muc' ajwalil yu'un Basán, soc ta spisil te muc' ajwaliletic ta Canaán.

¹² Te slum-sq'uinalic te muc' ajwaliletic la yac'bey yu'unin te lum Israele.

¹³ Cajwal, sbajt'el q'uinal ayat atuquel; sbajt'el q'uinal ayat ta na'el.

¹⁴ Te Cajwaltic stojil ya xchajban te lum yu'un; ya sna'bey yo'bolil sbaic te abatetic yu'une.

¹⁵ Te loc'ombaetic yu'unic te mach'atic ma ba xch'uunejic te cuxul Dios, pasbilic ta oro soc ta plata, ja'ic te bitic ya spas ta sc'abic te winiquetique.

¹⁶ Ay yeic, pero ma xc'opojic; ay sitic, pero ma x'ilawanic;

¹⁷ ay xchiquinic, pero ma xyaiyic q'uinal, soc ma ba cuxajtic.

¹⁸ Ja' nix pajal c'oemic soc te loc'ombaetic te mach'atic la spasic, soc te mach'atic xch'uunejique.

¹⁹ Israeletic, albeyaic yutsil sc'oplal te Cajwaltique; sacerdoteetic, albeyaic yutsil sc'oplal te Cajwaltique;

²⁰ levitaetic, albeyaic yutsil sc'oplal te Cajwaltique; ja'ex te awich'ojic ta muc', albeyaic yutsil sc'oplal.

²¹ Bayaluc me yutsil sc'oplal ta Sión te Cajwaltic te nainem ta Jerusalén. ¡Bin nax yutsil te Cajwaltique!