Salmos 132 - Bible in Tzeltal de Oxchuc y Tenejapa

Te bila yaloj Dios ya x'ac'bot David

^1-2 Cajwal, ja'at te Yipat yo'tan Jacob, na'a me te David, soc te swocol c'ax yu'une; na'a me te bila mero jc'axel yalojbat ta atojol:

³ “Ma ba ya x'ochon ta yutil jna, soc ma ba ya jmejts'an jba ta cux-o'tan,

⁴ ma ba ya jmuts' jsit, ma ba ya xwayon ajc'uc,

⁵ ja' to teme la jtabat ta leel ana te Cajwalat, te Yipat yo'tan Jacob”, te xie.

⁶ Ta Efrata chicnaj sc'oplal ta alel te cajón yu'un trato, la jtatic ta ja'maltic ta Jaar.

⁷ Ya xbootic ta templo yu'un Cajwaltic; ac'a jquejan jbatic ta stojol te scajtijib yacan.

⁸ Cajwal, jajch'an soc te cajón awu'un te ay awu'el tey a, la' ta wits te banti ya acux awo'tane.

⁹ Ac'a slapic c'oem te colel te sacerdoteetic awu'une; te mach'atic jun yo'tanic ta atojol, ac'a awunicuc ta swenta yutsil q'uinal yaiyic.

¹⁰ Ta swenta bit'il c'ux ta awo'tan te awabat David, ma xach'ay te muc' ajwalil tsabil awu'un.

¹¹ Te Cajwaltic ay bila mero jc'axel yaloj ta stojol David, mero jc'axel yaloj te ma xju' ya sujt'es sc'op:

¹² “Ya me cac' najc'ajuc jtuluc ta amuc'ul nactijib te patil alnich'an awu'une. Te patil alnich'anetic awu'un, teme ya yaq'uic c'otuc ta pasel te trato cu'un, soc te mandaliletic ya cac'bey snopic, te snich'nabic ta cajalcaj ya me yu'uninbat sbajt'el q'uinal te muc'ul nactijibal awu'une”, te xie.

¹³ Te Cajwaltic ja' tsabil yu'un te wits Sión; la stsa yu'un ya xnain tey a.

¹⁴ Jich yaloj: “Ja' in wits to ja' te banti ya jc'an ya xnainon spisil ora; tey me ya xnainon a, yu'un jich ya sc'an co'tan.

¹⁵ Ya me cac'bey bayal bendición ta swe'elic; ma me ba ya cac' lajuquic ta wi'nal te me'baetique.

¹⁶ Te sacerdoteetic ya me cac'bey slapic c'oem te colel cu'une; soc ya me cac' ta aw swenta yutsil q'uinal te mach'atic jun yo'tanic ta jtojole.

¹⁷ Tey me ya cac' pulinuc xan a te yip David. Tsumbilix c'ajc' cu'un c'oem, ja' yu'un te muc' ajwalil tsabil cu'une.

¹⁸ Te scontrotac ya cac'bey bayal q'uexlal; yan stuquel, ya me cac'bey xojobil”, xi'.