Salmos 12 - Bible in Tzeltal de Oxchuc y Tenejapa

Sc'anel coltayel ta stojol Dios

¹ Coltayawon, Cajwal, melel ma'yuquix mach'a jun yo'tan ta atojol; ma'yuquix te mach'a lec yo'tanique.

² Ya spas sbaic ta lot; lec sc'opic yaiyel, ja'uc me to, ma jichuc te yo'tanique.

³ Cajwal, bula loq'uel soc yisim te mach'atic cheb yo'tanic soc te ya stoy sbaique.

⁴ Melel jich ya yalic: “Te bit'il ay quejtic, tic'otic abi; ya jcoltay jbatic ta quejtic. ¿Mach'a c'an stoy sba ta yalel mandal ta jtojoltic?” xiic.

⁵ Yan te Cajwaltic jich ya yal: “Te mach'atic me'baetic ta q'uinal soc te peq'uel ayique, yacalic ta uts'inel soc yacalic ta ac'beyel swocolic. Jich yu'un ya me xjajch'on yo'tic, ya me cac'bey te coltayel te bayal sc'anojique”, xi'.

⁶ Te bitic yaloj te Cajwaltic, ma'yuc bi scapoj ta alel; jich yutsil c'oem te bit'il mero lequil plata, te juqueb buelta lecubtesbil ta horno.

⁷ Te ja'at, Cajwal, ya me acanantayon; spisil me ora ya acom ta jtojol te mach'atic j'uts'inwanejetique.

⁸ Te mach'atic amenic ya xpaxajic ta bayuc, melel spisil ants-winiquetic ya smulanic te bitic amene.