Salmos 119 - Bible in Tzeltal de Oxchuc y Tenejapa

Yutsil sc'oplal smandal Dios - 1 -

¹ Bin nax me yutsil te mach'atic mero ma'yuc smulic te yich'oj ta yo'tanic te p'ijubtesel yu'un te Cajwaltique.

² Bin nax me yutsil te mach'atic yat'elinejic xch'uunel te mandaliletic yu'une, soc te spisil yo'tanic yacalic ta sleel yutsil,

³ ja' te mach'atic ma'yuc bila amen ya spasic, yu'un ja' st'unojbeyic sbe te Cajwaltique.

⁴ Ja'at awaloj tulan mandal te ya yich' ch'uunel spisil te mandaliletic awu'une.

⁵ Co'tan ya jch'uun ta lec te mandaliletic awu'une.

⁶ Jich ma jta q'uexlal ta atojol teme spisil co'tan cat'elinej xch'uunel te mandaliletic awu'une.

⁷ Jun co'tan ya calbat awutsilal teme p'ijubon yu'un te stojil chajbanel awu'une.

⁸ Ya jc'an ya jc'otes ta pasel te mandaliletic awu'une. Ma me ayuc bi ora xapijt'eson.

- 2 -

⁹ ¿Bit'il ma'yuc smul ya xbeen te quereme? Ja' to teme ya xch'uun spasel te bila ya yal te ac'ope.

¹⁰ Te jo'on ya jleat ta spisil co'tan; ma xawac' xjowejon ta xch'uunel te mandaliletic awu'une.

¹¹ Cac'oj ta co'tan te ac'ope swenta yu'un ma jta jmul ta atojol a.

¹² Cajwal, bin nax awutsil te ja'ate; p'ijubtesawon a te mandaliletic awu'une.

¹³ Ya me cal ta spisil te bitic la achap te loc' ta alel awu'une.

¹⁴ Te be yu'un te mandaliletic awu'un ya yac'bon yutsil co'tan, c'axem jich te bit'il c'ulejaliletique.

¹⁵ Ya me jnopilay ta co'tan te mandaliletic awu'un; ya me caiy stojol sc'oplal ta lec te be awu'une.

¹⁶ Bin nax co'tan yu'un te mandaliletic awu'un; ma xch'ay ta co'tan te ac'ope.

- 3 -

¹⁷ Ac'bon jcuxlejal jo'on te awabatone, jich ya me jch'uunbat te ac'ope.

¹⁸ Ac'bon quil q'uinal ta lec, swenta yu'un ya quil a te jchajp nax yutsilal te amandale.

¹⁹ Jo'on jyanlumon ta q'uinal; ma me xanac' ta jtojol te mandaliletic awu'une.

²⁰ Ta spisil ora ya jmel co'tan, yu'un te ma ba c'oem ta co'tan te bitic chajbanbil awu'une.

²¹ Ja'at ya acom te mach'atic toybaetic soc te amenic, te ya yijq'uitaybat te mandaliletic awu'une.

²² Q'uejbon bael ta jtojol te yixta-c'opic soc te ilayel ta jtojol yu'unic, melel la caq'uix ta co'tan te mandaliletic awu'une.

²³ Manchuc me tulan winiquetic ya xchajbanbonic jc'oplal ta uts'inel, ja'uc me to, te abaton awu'un, ja' me ya jnopilay ta co'tan te mandaliletic awu'une.

²⁴ Bin nax co'tan yu'un te mandaliletic awu'un, melel ja' te ya stojtesone.

- 4 -

²⁵ Ayonix ta lajel; ac'bon jcuxlejal jich bit'il te awaloje.

²⁶ La cac'batix awil te cat'el, la awalbonix sc'oplal; p'ijubtesawon a te mandaliletic awu'une.

²⁷ Ac'bon c'otuc ta co'tan sna'el te mandaliletic awu'un; ya jc'an ya jnopilay ta co'tan te jchajp at'eliletic awu'une.

²⁸ Ma xcujch'ix te mel-o'tan ya caiye; wentainawon ta lec, jich bit'il te awaloje.

²⁹ Ma xawac'on ta pas-lot; wocoluc, ac'bon me te p'ijubtesel awu'une.

³⁰ Ja' jtsaojix te bila smelelil awu'un, ya smulan co'tan te bitic chapal awu'une.

³¹ Cajwal, bayal sc'oplal ta co'tan te mandaliletic awu'une; ma xawac'bon jwocol ta q'uexlal.

³² Ya me jsuj jba ta spasel te mandaliletic awu'un, melel ya anojesbon yutsil co'tan.

- 5 -

³³ Cajwal, ac'bon quil te be yu'un te mandaliletic awu'un, ya jc'an ya jt'un ja' to c'alal ta slajibal c'aal.

³⁴ Ac'bon sp'ijil co'tan yu'un ya me cac' ta co'tan te p'ijubtesel awu'un; ya jc'an ya jch'uun spasel ta spisil co'tan.

³⁵ Ic'awon bael ta be yu'un te mandaliletic, melel ya xjam q'uinal ya caiy yu'un.

³⁶ Ac'bon ta co'tan te ja'uc ya jmulan te mandaliletic awu'une; ma me ja'uc ay sc'oplal ta co'tan te bic'tal-o'tanil yu'un te taq'uine.

³⁷ Ma me xawac'bon quil te bitic tojol nax ay ta ch'uunel; ac'bon jcuxlejal yu'un st'unel te be awu'une.

³⁸ Jo'on te awabaton, ac'bon ta co'tan te bitic awaloj ta jamal te ya awac'bey te mach'atic yich'ojat ta muq'ue.

³⁹ Q'uejbon bael ta jtojol te ixta c'op te ya xiwon yu'un; melel te bitic achapoj ta awo'tan mero lec stuquel.

⁴⁰ Te jo'on ya sc'an co'tan te amandal achapoje; ac'bon jcuxlejal, melel te ja'ate toj awo'tan atuquel.

- 6 -

⁴¹ Cajwal, ac'bon quil te xc'uxul awo'tan, soc ac'bon quil te coltayel awu'un, jich te bit'il awaloj ta jamale.

⁴² Jich me ya xju' cu'un sujt'esel sc'op te mach'a ya yixtac'optayon, melel ja' smuc'ul co'tan te ac'ope.

⁴³ Ma me x'apojbon loq'uel ta que te smelelil ac'ope, melel ja' me yipinej co'tan te bitic chajbanbil awu'une.

⁴⁴ Ya jc'an ya jc'ajtes jba ta lec a te p'ijubtesel awu'une, jich ya jpas bael ta spisil ora ta sbajt'el q'uinal.

⁴⁵ Jich me libre ya xcuxinon ta q'uinal a, melel ja' jt'unoj te bitic awaloj ta mandale.

⁴⁶ Ya me calbey ta stojol muc' ajwaliletic te mandaliletic awu'un, ma ba ya xtal q'uexlal ta co'tan yu'un.

⁴⁷ Melel c'ux ta co'tan te mandaliletic awu'un; bin nax co'tan yu'un ya caiy.

⁴⁸ C'ux ta co'tan soc ya sc'an co'tan te mandaliletic; soc bayal ya jnop ta co'tan te mandaliletic awu'une.

- 7 -

⁴⁹ Na'ame te ac'op la awalbon, jo'on te awabatone, te la awac'bon smuc'ulin co'tane.

⁵⁰ Te bila ya smuc'tesbon co'tan te c'alal ayon ta mel-o'tane, ja' te bitic awaloje, ja' ya yac'bon jcuxlejal a.

⁵¹ Te mach'atic toybaetic ya yixtac'optayonic ta spisil ora; ja'uc me to, ma ba ya quijq'uitay te p'ijubtesel awu'une.

⁵² Cajwal, ya jna' te bitic la achap ta awo'tan ta namey, ja'ic te ya jta smuc'ul co'tan yu'un a.

⁵³ Te mach'atic amenic te ya yijq'uitayic te p'ijubtesel awu'un, ya yac'bonic x'ilin co'tan yu'un.

⁵⁴ Te mandaliletic awu'un ja' c'ayojetic cu'un ta lumq'uinal ta bay c'axel nax ayone.

⁵⁵ Cajwal, ta jujun ajc'ubal ya jna'at; ya jc'an ya jc'ajtes jba ta spasel te p'ijubtesel awu'une.

⁵⁶ Ay ta jwenta spasel te ya jch'uun te mandaliletic awu'une.

- 8 -

⁵⁷ Cajwal, atuquel nax ayat ta co'tan; calojix ta jamal te ya jc'ajtes jba ta spasel te bila awaloje.

⁵⁸ Ta spisil co'tan cat'elinej spasel te bila lec awo'tan yu'une; c'uxtayawon, jich te bit'il awaloj ta jamale.

⁵⁹ Tal ta co'tan te bi yilel te cat'ele, jich la jch'uunbat xan spasel te mandaliletic awu'une.

⁶⁰ Cac'ojix puersa, ma ba ya xch'ajubon ta spasel te mandaliletic awu'une.

⁶¹ Ta sjoylejal la yac'bonic spejts'ul te mach'atic amen yo'tanic; ja'uc me to, ma ba jch'ayoj ta co'tan te p'ijubtesel awu'une.

⁶² Ta olil ajc'ubal ya xjajch'on ta yalel awutsilal yu'un te stojil chajbanel awu'une.

⁶³ Ja' me joy jba soc te mach'atic ya yich'at ta muc', ja' te mach'atic ya xch'uunic te mandaliletic awu'une.

⁶⁴ Cajwal, nojel xc'uxul awo'tan ta balumilal; p'ijubtesawotic a te mandaliletic awu'une.

- 9 -

⁶⁵ Cajwal, lec te bila apasojbon ta jtojol te awabatone, jich nix te bit'il awalojbone.

⁶⁶ P'ijubtesawon ta lec te yacuc jna' jtsajtaybel jba, soc ac'bon ta co'tan te p'ijil c'ope, melel smuc'ulinej co'tan te mandaliletic awu'une.

⁶⁷ Te c'alal ma to x'ac'boton c'axuc jwocol bayal jowejon ta spasel te bitic ma lecuque, ta ora yo'tic jch'uunejbatix spasel te bila awaloje.

⁶⁸ Mero lecat atuquel, soc atuquel nax te lec bila ya apase; p'ijubtesawon a te mandaliletic awu'une.

⁶⁹ Te mach'atic toybaetic tojol nax ya sleonic ta c'op; ja'uc me to, spisil co'tan jch'uunejbat spasel te mandaliletic awu'une.

⁷⁰ Ma sna'ic q'uinal ta jyalel stuquelic, te jo'one bin nax co'tan yu'un te p'ijubtesel awu'une.

⁷¹ Lec te bit'il ac'boton c'axuc jwocol, jich la jnopbat te mandaliletic awu'une.

⁷² Te p'ijubtesel ya xloc' ta alel awu'un, c'axem to xan lec c'oem ta co'tan jich te bit'il bayal ta jmil oro soc plata.

- 10 -

⁷³ Ja'at la apason, ja'at la awac'bon jbaq'uetal; ac'bon sp'ijil co'tan ta snopel te mandaliletic awu'une.

⁷⁴ Te mach'atic ya yich'at ta muc', bin nax yo'tanic yu'un te c'alal ya yilonique, ja' yu'un te smuc'ulinej co'tan te ac'ope.

⁷⁵ Cajwal, ya jna' te mandaliletic awu'un te toj aye, soc te ay swentail c'alal ya awac' xwoclajone.

⁷⁶ Te xc'uxul awo'tan ja' me ya xtuun cu'un smuc'tesbelon co'tan, jich nix te bit'il awaloj ta jtojole.

⁷⁷ Ac'bon quil te t'ujbil yutsil awo'tan soc ac'bon cuxinucon, melel bin nax co'tan yu'un te p'ijubtesel awu'une.

⁷⁸ Ac'a me yich' q'uexlaltesel te mach'atic toybaetic te ma'yuc swentail te ya yuts'inonique; ya jc'an ya jnop ta co'tan te mandaliletic awu'une.

⁷⁹ Ac'a me sjoinon te mach'atic ya yich'at ta muq'ue, ja' te mach'atic ya sna'beyic sba te mandaliletic awu'une.

⁸⁰ Tojobenuc me co'tan yu'un te mandaliletic awu'un, swenta yu'un ma ba ya jta q'uexlal.

- 11 -

⁸¹ Lajelonix ya caiy ta smaliyel te jcoltayel awu'une; ja' smuc'ulinej co'tan te ac'ope.

⁸² Ya xlubix jsit yu'un smaliyel te bila awaloje, soc jich ya cal: “¿Bi ora ya xtal amuc'tesbon q'uinal caiy?” xoon.

⁸³ Manchuc me mamalonix te ma'yuquix cutsil ta q'uinal soc ch'aybilonix ta o'tanil, pero ma ba ch'ayem ta co'tan te mandaliletic awu'une.

⁸⁴ ¿Jayeb xan c'aal ya jmaliy? ¿Bi ora ya awac'bey castigo te mach'atic ya yuts'inonique?

⁸⁵ Te toyba ants-winiquetic, te ma xch'uunic te p'ijubtesel awu'une, la sjoc'boniquix ch'en te banti ya xch'ayon coel.

⁸⁶ Coltayawon, yu'un ma'yuc swentail te ya yuts'inonique. Te mandaliletic awu'un smelelil ta spisilic.

⁸⁷ Jteb xanix ma xquich' tup'el ta q'uinal; ja'uc me to, ma'yuc bay ch'ayem ta co'tan te mandaliletic awu'une.

⁸⁸ Te bit'il c'uxon ta awo'tan, ac'bon te jcuxlejale; ya me jc'otes ta pasel te mandaliletic te loq'uem ta alel awu'une.

- 12 -

⁸⁹ Cajwal, te ac'ope sbajt'el q'uinal ay, ma xyanaj sbajt'el q'uinal ta ch'ulchan.

⁹⁰ Jun awo'tan ta jtojoltic sbajt'el q'uinal; ja'at la atulantes te lumq'uinal, jich tulanaj jilel.

⁹¹ Tulan ayic spisil te bitic la apase, jich te bit'il awaloje, melel spisil ayic ta abatinel awu'un.

⁹² Te manchuc bin nax co'tan yu'un te p'ijubtesel awu'une ch'ayonix ta q'uinal yu'un mel-o'tan te jichuque.

⁹³ Ma'yuc bi ora ya xch'ay ta co'tan te mandaliletic awu'un, melel ja'ic te ya awac'bon jcuxlejal yu'une.

⁹⁴ Coltayawon, melel awu'unon, soc jt'unoj te mandaliletic awu'une.

⁹⁵ Te mach'atic amen yo'tanique yacalic ta smaliyel te bi ora ya xju' ya smilonique; ja'uc me to, ay ta co'tan te mandaliletic awu'une.

⁹⁶ Ya quil te bitic aye ay slajibal ta spisil; yan te mandaliletic awu'un mero ma'yuc slajibal stuquel.

- 13 -

⁹⁷ Ma p'isbiluc nax c'ux ta co'tan te p'ijubtesel awu'une; spisil c'aal ya calulay ta co'tan.

⁹⁸ Te mandaliletic awu'un, cu'un sbajt'el q'uinal; yac'ojbon jp'ijil c'axem to xan a te bit'il ay te jcontrotaque.

⁹⁹ C'axem jich ya jna' a te bit'il ya sna'ic spisil te maestroetic cu'un, melel bayal ya jnop ta co'tan te mandaliletic awu'une.

¹⁰⁰ C'axem jich ya jna' a te bit'il ya sna'ic te mamaletic, melel te jo'on jch'uunej spasel te mandaliletic awu'une.

¹⁰¹ C'ubul la quijq'uitayix jilel sbelal te bitic ma lecuc swenta yu'un jich me ya xc'ot ta pasel cu'un a te ac'ope.

¹⁰² Ma'yuc bay ya jch'aybat te tojtesel chajbanbil awu'un, melel ja'at te la ap'ijubtesone.

¹⁰³ Te bila awaloj bayal xchi'il sbujts' ya caiy, c'ax jich te bit'il xchi'il ta que te chabe.

¹⁰⁴ Te mandaliletic awu'un la jtaix sp'ijil jol yu'un; ja' swentail te ya quilayix spisil te lotil at'elile.

- 14 -

¹⁰⁵ Te ac'ope xojobajem cacan ta beel yu'un, soc sacuben te jbe yu'une.

¹⁰⁶ Ay bila caloj ta jamal, ya me jc'otes ta pasel; ya me cat'elin spasel te bitic toj achapoje.

¹⁰⁷ Cajwal, bayal ayon ta wocol ya caiy; ac'bon jcuxlejal, jich te bit'il awaloje.

¹⁰⁸ Cajwal, te lecuc awo'tan yu'un te ya calbat wocole; p'ijubtesawon a te bitic toj chajbanbil awu'une.

¹⁰⁹ Spisil ora quechelon ta lajel ya caiy; ja'uc me to, ma ba ya jch'ay ta co'tan te p'ijubtesel awu'une.

¹¹⁰ Te mach'atic amenic ya xchajbanbonic jpejts'ul; ja'uc me to, ma ba ya quijq'uitay ta co'tan te mandaliletic awu'une.

¹¹¹ Te bila ac'boton cu'unin sbajt'el q'uinal, ja' te mandaliletic awu'un; bin nax co'tan yu'un.

¹¹² Ta spisil co'tan jnopojix te ya cat'elin spasel te mandaliletic awu'un ta spisil ora ja' to ta slajibal.

- 15 -

¹¹³ Ya quilay te ants-winiquetic te cheb yo'tanic; pero ja' c'ux ta co'tan te p'ijubtesel awu'une.

¹¹⁴ Ja'at nac'jibalat cu'un soc ja'at jmajq'uilat; ja' smuc'ul co'tan te ac'ope.

¹¹⁵ Q'ueja abaic ta jtojol te amenexe, te jo'on ya jc'an ya jch'uunbey te mandaliletic yu'un te Dios cu'une.

¹¹⁶ Ac'bon quip jich bit'il awaloj, jich ya xcuxinon; ma me xjilon ta q'uexlal yu'un te bila smuc'ulinej co'tane.

¹¹⁷ Coltayawon, jich me ya xcolon; jich me ya jc'otes ta pasel spisil ora te mandaliletic awu'une.

¹¹⁸ Ya awilay te mach'atic ya xch'aybat te mandaliletic awu'un, melel te bitic snopoj ta yo'tanic, ma'yuc swentail ta jyalel.

¹¹⁹ Te mach'atic amenic ta q'uinal, jich c'oem ta awo'tan te bila ch'aybile; ja' swentail te jo'on c'ux ta co'tan te mandaliletic awu'une.

¹²⁰ Te jbaq'uetal ya xnijc' yu'un xiwel ta atojol; ya quich' ta muc' te bila chapal awu'une.

- 16 -

¹²¹ Ma'yuc bay quijq'uitayej ta pasel te bitic toje; ma me xawac'on jilel ta sc'ab te j'uts'inwanejetique.

¹²² C'opojan cu'un; ma me c'axemuc ya yuts'inonic te mach'atic toybaetique.

¹²³ Ya xlubix jsit yu'un smaliyel te ya acoltayon; yacon ta smaliyel te ya awac'on ta libre, jich te bit'il awalojbone.

¹²⁴ C'uxtayawon jo'on te awabaton, jich te bit'il ay xc'uxul awo'tan; p'ijubtesawon a te mandaliletic awu'une.

¹²⁵ Jo'on te awabatone. Ac'bon sp'ijil co'tan, yu'un ya jc'an ya jna' te mandaliletic awu'une.

¹²⁶ Cajwal, yorailix te ayuc bila ya apas jtebuc, melel xc'axintayejic te p'ijubtesel awu'une.

¹²⁷ Ja' swentail te c'ux ta co'tan te mandaliletic awu'un; c'axem jich ta co'tan a te bit'il lequil oro.

¹²⁸ Jich yu'un ja' jtojteswanej cu'un te mandaliletic awu'un; ya quilay spisil te lotil at'elile.

- 17 -

¹²⁹ Te mandaliletic awu'un jchajp yutsil ta jyalel; ya me jch'uun soc co'tan.

¹³⁰ Ya awac' ta cholel te ac'op, jich ya sacub q'uinal yu'un; melel ya xp'ijub yu'un te ac'op te ants-winiquetic te peq'uelique.

¹³¹ Ya jmulan, ya jic' co'tan, yu'un ya sc'an co'tan te mandaliletic awu'une.

¹³² Ilawilon, na'bon yo'bolil jba, jich bit'il ya apasbey te mach'atic c'uxat ta yo'tanique.

¹³³ Ac'bon jpas jujun c'aal jich te bit'il awaloj; ma xawac' yu'uninon te bitic ma lecuque.

¹³⁴ Ac'awon ta libre, ma xawac' yuts'inonic te ants-winiquetic, yu'un ya jc'an ya jc'otes ta pasel te mandaliletic awu'une.

¹³⁵ Lecucon me ta asit te awabaton, p'ijubtesawon a te mandaliletic awu'une.

¹³⁶ Pajalix soc yocja' te ya'lel jsit yac ta loq'uel, yu'un ma x'ich'ot ta muc' te p'ijubtesel awu'une.

- 18 -

¹³⁷ Cajwal, tojat atuquel, soc toj ayic te bila chapal awu'une.

¹³⁸ Spisil te mandaliletic awu'un toj nopbil soc smelelil ay.

¹³⁹ Ya xlajon ya caiy yu'un te bayal sc'oplal ta co'tan te ac'ope; yan te jcontrotac la xch'ayix ta yo'tanic.

¹⁴⁰ Te ac'op awaloj stalel ay yip stuquel; ja' swentail te c'ux ta co'tan te ac'ope, jo'on te awabatone.

¹⁴¹ Peq'uelon te jo'on soc ilaybilon; ja'uc me to, ma ba jch'ayoj ta co'tan te mandaliletic awu'une.

¹⁴² Te toj-o'tanil awu'un stalel ay, soc smelelil te p'ijubtesel awac'oje.

¹⁴³ Ay woclajel soc mel-o'tan ya caiy; ja'uc me to, te mandaliletic awu'une bin nax co'tan yu'un.

¹⁴⁴ Te mandaliletic awu'un toj ayic sbajt'el q'uinal stuquel; ac'bon jna', jich me ya xcuxinon.

- 19 -

¹⁴⁵ Cajwal, ta spisil co'tan ya jc'oponat; jac'bon me jc'op, yu'un ya jc'an ya jc'otes ta pasel te mandaliletic awu'une.

¹⁴⁶ La' coltayawon, swenta yu'un ya jpas te mandaliletic awu'une.

¹⁴⁷ C'alal ma to sacub a te q'uinal, ya xjajch'on, soc ya jc'anbat coltayel; ja' smuc'ulinej co'tan te ac'ope.

¹⁴⁸ C'alal ma to x'ijc'ub a te q'uinal, wiq'uil te jsite, swenta yu'un ya me jnop ta co'tan te ac'op awaloje.

¹⁴⁹ Cajwal, aiybon awaiy jc'op ta swenta te xc'uxul awo'tan; ac'bon jcuxlejal, jich te bit'il ya sc'an awo'tan atuquel.

¹⁵⁰ Nopol ayiquix te mach'atic amenic te ya sc'an yuts'inonic; ja'uc me to, c'ubul jilem yu'unic te p'ijubtesel awu'une.

¹⁵¹ Te ja'at Cajwal, nopol ayat; smelelil ta spisil te mandaliletic awu'une.

¹⁵² Mero bayalix c'aal la jna' te mandaliletic awu'un, te la anajc'an atuquel swenta sbajt'el q'uinal.

- 20 -

¹⁵³ Ilbon awil te jwocol, coltayawon, melel ma ba ch'ayem ta co'tan te p'ijubtesel awu'une.

¹⁵⁴ C'opojan yu'un te falta cu'un, ac'awon ta libre yu'un; ac'bon jcuxlejal, jich bit'il te ac'op awaloje.

¹⁵⁵ Te coltayel awu'un c'ubul to ay ta stojolic te mach'atic amenic, melel ma sc'an sleic te mandaliletic awu'une.

¹⁵⁶ Cajwal, c'ax muc' ta jyalel te t'ujbil yutsil awo'tan; ac'bon jcuxlejal, jich te bit'il ya sc'an awo'tan atuquel.

¹⁵⁷ Bayalic te jcontrotac te ya yuts'inonic; ja'uc me to, ma ba ya quijq'uitay ta co'tan te mandaliletic awu'une.

¹⁵⁸ Ma xcujch'ix cu'un te bila muquen ya spasic te mach'atic ma xch'uunic te mandaliletic awu'une.

¹⁵⁹ Cajwal, ilawil te bit'il c'ux ta co'tan te mandaliletic awu'un; ac'bon jcuxlejal ta scaj te xc'uxul awo'tane.

¹⁶⁰ Te ac'op ts'acal ya yal te bila smelelil; toj sbajt'el q'uinal stuquel te bitic achajbanej ta awo'tane.

- 21

¹⁶¹ Te winiquetic muc' sc'oplalic, ma'yuc swentail ya yuts'inonic; yan te jo'on, soc co'tan quich'oj ta muc' te ac'ope.

¹⁶² Te jo'on bin nax co'tan ya caiy yu'un te ac'op awaloj, jich c'oem te bit'il mach'a ya sta muc' sc'ulejale.

¹⁶³ Ya quilay te lot, ma xcujch' cu'un; ja'uc me to, c'ux ya caiy ta co'tan te p'ijubtesel awu'une.

¹⁶⁴ Juqueb buelta ta jun c'aal ya calbat awutsilal ta scaj te stojil ay te chajbanel awu'une.

¹⁶⁵ Te mach'atic c'ux ya yaiy ta yo'tan te p'ijubtesel awu'un, mero lamal q'uinal ta stojolic, ma'yuc bila ya stsalot yu'un.

¹⁶⁶ Cajwal, ya jmaliy te ya acoltayon, melel c'oemix ta pasel cu'un te mandaliletic awu'une.

¹⁶⁷ Te jo'on ya jch'uun te mandaliletic awu'un, soc ta spisil co'tan c'ux ya caiy.

¹⁶⁸ Jch'uunej te bitic awaloj soc te mandaliletic awu'un; te ja'ate ya ana'bon spisil te cat'ele.

- 22 -

¹⁶⁹ Cajwal, ac'a c'otuc ta atojol te caw; ac'bon sp'ijil co'tan, jich te bit'il ac'op awaloje.

¹⁷⁰ Ac'a c'otuc ta atojol te ya jc'oponate, ac'awon ta libre, jich bit'il te awaloje.

¹⁷¹ Loc'uc ta que ta yalel yutsil ac'oplal, melel ja'at la ap'ijubteson a te mandaliletic awu'une.

¹⁷² Ac'a jc'ajintay loq'uel te ac'op awaloj, melel spisil te mandaliletic awu'un toj ayic stuquel.

¹⁷³ Chapaluc me ac'ab te ya awac'bon coltayel, melel ja' jmulanej te mandaliletic awu'une.

¹⁷⁴ Cajwal, ya jc'an te yacuc acoltayone. Bin nax co'tan ya caiy yu'un te p'ijubtesel awu'une.

¹⁷⁵ Ja' ya jc'an xcuxinon ta q'uinal, yu'un yalel yutsil ac'oplal; ja' ac'a scoltayon te amandale.

¹⁷⁶ Ch'ayemon jichuc jcojt' chij, la' me, leawon, yu'un ma ba ch'ayem ta co'tan te mandaliletic awu'une.