Salmos 118 - Bible in Tzeltal de Oxchuc y Tenejapa

Yu'el Cajwaltic ma'yuc bi ya spaj

¹ Albeyaic wocol te Cajwaltic. Albeyaic wocol te Cajwaltique, melel lec yo'tan stuquel, soc te xc'uxul yo'tan sbajt'el q'uinal ay.

² Te israeletic ac'a yalic: “Te xc'uxul yo'tan Cajwaltic, sbajt'el q'uinal ay”, xiuquic me.

³ Te sacerdoteetic ac'a yalic: “Te xc'uxul yo'tan Cajwaltic, sbajt'el q'uinal ay”, xiuquic me.

⁴ Te mach'atic ya yich'ic ta muc' te Cajwaltic ac'a yalic: “Te xc'uxul yo'tan Cajwaltic, sbajt'el q'uinal ay”, xiuquic me.

⁵ Te c'alal ayon ta wocol, la jc'opon te Cajwale; la yaiybon stojol jc'op stuquel, jich la yac'on ta libre.

⁶ Te Cajwaltic sjoinejon; jich ma xju' ya xiwon. ¿Bi ya xju' spasbon te winique?

⁷ Te Cajwaltic sjoinejon; ja' me ya scoltayon stuquel. Ya me quil ya yich' tsalel te mach'atic ay slab yo'tanic ta jtojol.

⁸ Ja' lec ya smuc'ulin co'tantic te Cajwaltique; ma ja'uc lec teme ya smuc'ulin co'tantic te winique.

⁹ Ja' lec ya smuc'ulin co'tantic te Cajwaltique; ma ja'uc lec teme ya smuc'ulin co'tantic te mach'atic muc' sc'oplalique.

¹⁰ Spisilic te nacionetic la sjoytayonic, pero ta swenta Cajwaltic la yich'ic jinel cu'un.

¹¹ La sjoytayonic ta spisil ta bayuc, pero ta swenta Cajwaltic la yich'ic jinel cu'un.

¹² La sjoytayonic jichuc xchanul chab, pero te sc'ajc'al yo'tanic tup' ta ora, jich bit'il ya xc'ajc' ch'ixetic; ta swenta Cajwaltic la yich'ic jinel cu'un.

¹³ La scotp'inonic swenta yu'un ya xyalon ta sc'opic a; ja'uc me to, te Cajwaltic tal scoltayon loq'uel ta sc'abic.

¹⁴ Ya jc'ajintay te Cajwal, melel ya yac'bon quip; ja' jcoltaywanej cu'un stuquel.

¹⁵ Ta snaic te winiquetic jun yo'tanic ta stojol, bin nax me yo'tanic ta sc'ajintayel te tsalawe: “Ta yu'el Cajwaltic la sta te tsalawe.

¹⁶ Te yu'el Cajwaltic, ma'yuc bila ya spaj. Ta yu'el Cajwaltic la sta te tsalawe”, xiic ta c'ayoj.

¹⁷ Ma ba ya xlajon, ya me xcuxinon, swenta yu'un ya me cal ta bayuc te bila spasoj te Cajwale.

¹⁸ Te Cajwal tulan yac'ojbon castigo; ja'uc me to, ma ba la yac'on bael ta lajel yu'un.

¹⁹ Jamaic te ti'nailetic yu'un templo, yu'un ya jc'an x'ochon bael ta yalel wocol te Cajwaltique.

²⁰ Ja' ti'nail yu'un Cajwaltic, te ya x'ochic bael a te mach'atic jun yo'tanic ta stojole.

²¹ Cajwal, ya calbat wocol, melel la ajac'bon te jc'ope; ja'at Jcoltaywanejat cu'un.

²² Te ton te ma lecuc la yilic te jpas-naetique, ja' mero muc' sc'oplal c'oem stuquel.

²³ Ja' spasoj Cajwaltic, jchajp nax q'uinal ya caiytic yu'un.

²⁴ Ja' in c'aal to at'ejix te Cajwaltique; ayuc me yutsil co'tantic soc binuc nax me co'tantic yu'un.

²⁵ Cajwal, wocoluc, coltayawotic. Cajwal, wocoluc, lecuc me ya xbeenotic awu'un.

²⁶ Jelawen yutsil te mach'a ya xtal ta swenta te Cajwaltique; Jelawen awutsilic ja'ex c'alal ta templo yu'un te Cajwaltique.

²⁷ Te Cajwaltic ja' Dios stuquel, ja' ya sacub q'uinal ta jtojolic yu'un. Jajch'uc meix te q'uin, ich'aic bael sc'ab te'etic ja' to c'alal ta xulubil scajtijib smajt'an te Diose.

²⁸ Ya calbat wocol soc ya calbey yutsil sc'oplal te amuc'ule; melel ja'at Diosat cu'un.

²⁹ Albeyaic wocol te Cajwaltique, melel lec yo'tan stuquel; te xc'uxul yo'tane sbajt'el q'uinal ay.