Salmos 114 - Bible in Tzeltal de Oxchuc y Tenejapa

Sna'jibal loq'uel tel ta Egipto

¹ Te bi ora loc' tel Israel ta Egipto, te bi ora loc' tel ta yan lum te sts'umbal Jacob,

² ja' templo yu'un Cajwaltic c'ot te Judá, soc och ta ajwalil yu'un Israel te Cajwaltique.

³ Te c'alal ilot yu'un mar te Israel, loc' ta anel te mare; jich te muc'ja' Jordán, sujt' ta spat.

⁴ Te witsetic jajch'ic ta wilel jichuc chijetic; te ch'in witsetic jajch'ic ta wilel jichuc ch'in chijetic.

⁵ ¿Mar, bi la apas te anate? ¿Jordán, bi la apas te sujt'at ta apate?

⁶ Witsetic, ¿bi yu'un jajch'ex ta wilel jichuc chijetic? Ja'ex, ch'in witsetic, ¿bi yu'un jajch'ex ta wilel jichuc chijetic?

⁷ Ja'at lumq'uinal, nijc'an me ta stojol te Cajwaltic te Dios yu'un Jacob.

⁸ Ja' la sc'atp'un ta pamal ja' te niwac tontiquil witse; soc la sc'atp'un ta sloq'uibja' te tulan tone.