Salmos 112 - Bible in Tzeltal de Oxchuc y Tenejapa

Yutsil q'uinal ya yaiy mach'a lec yo'tan

¹ ¡Bin nax yutsil te Cajwaltique! Bin nax me yutsil te mach'a ya yich' ta muc' te Cajwaltic, te lec ya yaiy ta yo'tan te mandaliletic yu'une.

² Te sts'umbal mach'a lec yo'tan ya me yich'ic bendición soc ay me yipic ta balumilal.

³ Ta sna ma me p'isbiluc sc'ulejal, soc spisil ora ay yutsil yo'tan.

⁴ Jich me te bit'il luz ta yolil ijc' q'uinal, te ya xojobaj ta stojol mach'atic te lec yo'tanique. Ya sna' yo'bolil jbatic, t'ujbil yutsil yo'tan soc toj te yo'tan.

⁵ Te mach'a lec yo'tan ma'yuc bi ya st'ut'iltay yaq'uel ta majanel, soc toj yo'tan ta xchonel te sp'olmale.

⁶ Jich ma'yuc bay ya sta falta; te winic toj yo'tan, na'bil sbajt'el q'uinal stuquel.

⁷ Ma xiw yu'un teme ay ma lecuc c'op ya xjul ta stojole; ts'unul ta lec yo'tan, ja' smuc'ulinej yo'tan te Cajwaltique.

⁸ Te yo'tan ts'unul ta lec, ma xiw ni jtebuc, asta ya stsal te scontrotaque.

⁹ Ya smajt'antes te me'baetic; spisil ora ay te sc'uxul yo'tane. Jamal me sit-yelaw; ma me ayuc q'uexlal ta stojol.

¹⁰ Te mach'a amen yo'tan ya xc'ajc'ub yo'tan ta yilel; ya xc'ux ye, yu'un ma'yuc bi ya xju' yu'un. Te mach'atic amen yo'tanic ya xch'ayic soc te sbic'tal yo'tanique.