Salmos 110 - Bible in Tzeltal de Oxchuc y Tenejapa

Cajwaltic ya yac'bey yip muc' ajwalil

¹ Te Cajwaltic Dios jich la yalbey te cajwale: “Naclan ta jwa'el, ja' to c'alal ya cac'bat apech' ta teq'uel te acontrotaque”, xi'.

² C'alal to ta Sión ya yac'bat ta ac'ab Cajwaltic te abastón, seña yip te awat'ele. Mandalajan atuquel ta stojol te acontrotaque.

³ Te lum awu'un bin nax yo'tan ya yac' sba ta ac'ab te bi c'aalil ya awaiy tsalawe. Ta sba te ch'ul witstiquil, jich bit'il ts'ujul ya xchicnaj te yac ta sacubel tel te q'uinale, jich me c'oem a te aqueremil te yanyan ta ach'ubel jujun c'aale.

⁴ Te Cajwaltic ay bila yaloj ta jamal, ma xju' ya xcha'sujt'es xan te sc'ope: “Ja'at sacerdoteat swenta sbajt'el q'uinal, te ja' nix pajal sacerdote ayat soc te Melquisedec”, xi'.

⁵ Te Cajwaltic ay ta swa'el ac'ab; te bi ora ya xc'ot te sc'ajc'al yo'tan, ya me sjin te muc' ajwaliletique;

⁶ ya me yalbey ta jamal te castigo ta stojol nacionetic; ya me sbusanbey sbaq'uetalic te mach'atic lajemique, ya me swuybey sjolic ta spamal balumilal.

⁷ Ta be ya yuch'bey ya'lel beja', te ja'e ya x'ac'bot xan yip yu'un.