Salmos 109 - Bible in Tzeltal de Oxchuc y Tenejapa

Sc'anel parte ta stojol muc'ul Juez

¹ Dios cu'un, te ya calbat bayal awutsil, ma me xquejch'ajat ta c'op.

² Yu'un te mach'atic jpas-lotetic soc te mach'atic ja' sc'opinejic te bila amene mero ma lecuc jc'oplal ya yalbonic, soc ma meleluc te bila ya yalique.

³ Te sc'opic puro lab-o'tanil ta jtojol; ma'yuc swentail te ya yac'bonic guerra.

⁴ Te xc'uxul co'tan ya sujt'esbonic ta guerra; ja'uc me to, ya jc'oponat yu'unic.

⁵ Te xc'uxul co'tan ya sujt'esbonic ta lab-o'tanil; manchuc me c'ux ya caiy ta co'tan te jo'one, ay slab yo'tan stuquelic.

⁶ Ac'beya ta sc'ab jtul juez te amen yo'tane; ja' nix me ac'a c'otuc ta lajel yu'un te mach'a teq'uel ta c'op yu'une.

⁷ Ta chajbajibal ac'a yich' alel ta jamal te bila a te smul stuquele; ja' nix me ac'a c'otuc ta woclajel yu'un te bila sc'oplal ya xcoltayot yu'une.

⁸ Ma me jaluc c'aal ya xcuxin; yanuc me mach'a ac'a c'otuc ta swenta te bitic ay yu'une.

⁹ Ac'a jiluc ta me'ba alal te snich'nabe; soc jiluc ta me'ba ants te yiname.

¹⁰ Te snich'nab ac'a beenuc ta bayuc ta c'anbajel; ac'a yich'ic ch'ojel loq'uel ta sna te jinemixe.

¹¹ Spisil te bitic ay yu'un ac'a ic'otuc bael yu'un te mach'a ya yac' ta majanel staq'uin; jyanlum winiquetic ac'a yich'beyic bael sit te yat'ele.

¹² Ma me ayuc mach'a ya xna'bot yo'bolil sba yu'un, ni ja'uc te snich'nab te jilemic ta me'ba alale.

¹³ Ac'a lajuc spisil te sts'umbale; ac'a yich' ch'ayel ta jc'axel sbajt'el q'uinal te sbiile.

¹⁴ Ac'a me sna' Cajwaltic te bitic ma lecuc spasoj te state; soc xujt' ma me xch'aybey smul te sme'e.

¹⁵ Te smulic ayuc me ta yo'tan spisil ora te Cajwaltic; ac'a yich' ch'ayel ta lumq'uinal te sna'jibale.

¹⁶ Ma la snop ta yo'tan sna'beyel yo'bolil sba yantic; ja' te mach'atic me'baetic, soc te mach'atic peq'uelic,soc te mach'atic ayic ta mel-o'tan, ja' nax la yat'elin snutsel, asta la smil spisil.

¹⁷ Te bit'il ja' la smulan te ya sboltesbey sc'oplal te yane, ac'a bolobuc sc'oplal ta jc'axel stuquel. Ma la sc'an bendición, ma me x'ac'botix bendición jiche.

¹⁸ Ac'a mucotuc yu'un jichuc c'u'il te sbol-c'oplale; ac'a ochuc ta yutil sbaq'uetal soc ta yutil sbaquel, jichuc me c'oem te bit'il ja' soc aceite te ya x'ajch'esot yu'une;

¹⁹ ac'a mucotuc yu'un jichuc c'u'il soc jichuc me ya xchucot ta lec te bit'il xchujq'uil xch'ujt'e.

²⁰ Jich me ya x'ac'bot stoj yu'un Cajwaltic te jcontrotac soc te mach'atic amen sc'opic cu'une.

²¹ Yan te ja'at Cajwal, ac'a aba ta ich'el ta muc', lecuc me awo'tan cu'un; coltayawon ta swenta te yutsil xc'uxul awo'tane.

²² Bayal ayon ta wocol soc bayal ayon ta mel-o'tan; ay ejch'en ta co'tan ya caiy.

²³ Jich xquecheton ta lajel bael te bit'il axinal; te iq'ue jich ya swileson bael ya caiy te bit'il c'ulub.

²⁴ Te bit'il ma xwe'onixe, ya xnijc' te sjol cacane; yaconix ta yaubel ta scaj te ma'yuc we'ele.

²⁵ Jo'on xjajch'ibalon stse'ejic te ants-winiquetique; te c'alal ya yilonic, ya sjimulay sjolic ta slabanbelonic.

²⁶ Coltayawon, Cajwal, Dios cu'un; coltayawon ta scaj te c'uxon ta awo'tane.

²⁷ Cajwal, ac'a sna'ic te ja'at apasoj ta ac'abe.

²⁸ Ma'yuc sc'oplal ta co'tan te ya sbolc'optayonic, ja' nax teme ya awac'bon bendicione. Ac'a me q'uexawuquic, ja'uc me yutsil co'tan ya caiy te awabatone.

²⁹ Ac'a me nojuc q'uexlal ta yo'tanic te jcontrotaque; te q'uexlal ac'a mucotuc yu'un jichuc capa.

³⁰ Ya me calbey bayal wocol te Cajwaltique; ya me calbey yutsil sc'oplal ta yolil bayal ants-winiquetic.

³¹ Melel ja' ya xc'opoj yu'un te me'ba, soc ya me scoltay ta sc'ab te mach'atic ya xmilot yu'une.