Salmos 108 - Bible in Tzeltal de Oxchuc y Tenejapa

Chapalon soc co'tan

¹ Dios cu'un, chapalon soc co'tan ta atojol; chapalon yu'un ya jc'ajintayat. Tija aba, co'tan;

² tija aba jajch'el, arpa soc yantic música; ya me xjajch'on ta sacubel q'uinal.

³ Cajwal, ya calbat awutsil ta yolilic te lumetic; soc ya jc'ajintayat ta yolilic te nacionetique.

⁴ Melel te xc'uxul awo'tane c'axem to xan muc' yu'un a te ch'ulchane; te yutsil awo'tan staoj c'oel te ch'ulchane.

⁵ Dios cu'un, ayat ta sba te ch'ulchane; te yutsil axojobil nojel ta spamal balumilal.

⁶ Coltayawotic ta awu'el, swenta yu'un libre me ya xjilic te mach'atic c'ux ta awo'tane. Jac'botic a te jc'optique.

⁷ Te Dios c'opoj tel c'alal ta ch'ul templo yu'un: “Bin nax co'tan ya jpuc te sq'uinal Siquem soc ya jpuc te stenlej xatal q'uinal yu'un Sucot.

⁸ Te Galaad soc Manasés ayic ta jwenta; te Efraín ja' smajq'uil c'oem te jole; te Judá ja' jbastón c'oem yu'un pasaw ta mandal.

⁹ Te Moab ja vasija swenta spojquil c'abal cu'un; ta stojol Edom ya me jch'oj bael jxanab; ya me x'awunon swenta bit'il la caiy tsalaw ta stojol te filisteoetique”, xi' te Diose.

¹⁰ ¿Mach'a ya yic'on bael ta muc'ul lum te joybil ta ts'ajq'ue? ¿Mach'a ya x'ic'awan bael cu'un c'alal ta Edom?

¹¹ Melel ja'at, Diosat cu'untic, la ach'ojotic bael; melel ma ba ya xloc'atix bael soc te soldadoetic cu'untique.

¹² Coltayawotic ta sc'ab te jcontrotic; melel ma'yuc bi ya xju' yu'un te coltayel ya yac' te winique.

¹³ Te coltayel yu'un Dios muc' bila ya jpastic soc stuquel; ja' me ya sten coel ta lum te jcontrotique.